Kryeministri i Britanisë së Madhe Keir Starmer ka vendosur që të rinjtë 16 dhe 17 vjeç të kenë të drejtë vote, jo vetëm ata mbi 18 vjeç siç është aktualisht. Ky vendim ka shkaktuar diskutime të shumta, pasi disa mendojnë se kryeministri Keir Starmer po e përdor këtë masë për të fituar përkrahje politike, duke pasur parasysh se rezultatet e tij në sondazhe nuk janë të mira, një vit pas fitores në zgjedhje.
Nga ana tjetër, Starmer thotë se ky është një premtim që kishte bërë para zgjedhjeve të vitit 2024 dhe është e drejtë që të rinjtë të votojnë, sepse “nëse 16- dhe 17-vjeçarët mund të punojnë, të paguajnë taksa dhe të regjistrohen në ushtri me pëlqimin e prindërve, atëherë nuk ka arsye që të mos votojnë”.
Kjo masë do të paraqitet për diskutim në Parlament në shtator, pas pushimeve verore, dhe ka për qëllim të bëjë të njëjtat rregulla në gjithë Britaninë. Aktualisht, në Skoci dhe Uells, të rinjtë mbi 16 vjeç kanë të drejtë vote në zgjedhjet lokale, ndërsa në Angli kjo e drejtë u jepet vetëm personave mbi 18 vjeç. Për shembull, në Angli mund të marrësh patentë që në moshën 17 vjeç, por nuk mund të votojë apo të bësh tatuazh pa mbushur 18 vjeç.
Një pyetje kryesore është nëse përfshirja e këtyre të rinjve do t’i sjellë avantazh politik partisë Labour në zgjedhjet e ardhshme. Tradicionalisht, të rinjtë kanë tendencë të votojnë më shumë për Labour sesa për konservatorët, por situata po ndryshon. Sondazhet tregojnë se partia e djathtë Reform UK e Nigel Farage po fiton më shumë përkrahje tek të rinjtë, madje edhe në rrjetet sociale si TikTok. Për më tepër, nëse Jeremy Corbyn, një figurë shumë e njohur për të rinjtë nën 25 vjeç, krijon një parti të majtë alternative, kjo mund të ulë mbështetjen për Labour.
Sipas ekspertit Luke Tryl, që drejton organizatën “More in Common”, vota e 16- dhe 17-vjeçarëve nuk do të ndryshojë shumë gjërat në nivel kombëtar, pasi ata përbëjnë vetëm rreth 2% të elektoratit dhe zakonisht votojnë më pak se grupmoshat më të mëdha. Por në disa zona zgjedhore, ku gara është e ngushtë, vota e tyre mund të jetë shumë e rëndësishme.
Përveç kësaj, kryeministri Starmer ka njoftuar edhe masa të tjera për të bërë më të lehtë votimin, si votimi me postë, regjistrimi automatik në listat zgjedhore dhe kufizime më të rrepta për donacionet partiake mbi 500 euro, me qëllim parandalimin e ndërhyrjeve të huaja, përfshirë edhe ato të Elon Musk, megjithëse këto të fundit nuk u përmendën drejtpërdrejt.
