Një ngjarje tragjike ka tronditur Greqinë, ku një grua dhe i dashuri i saj dyshohet se kanë organizuar vrasjen e ish-bashkëshortit të saj një profesor polak në Agia Paraskevi.
Hetimet kanë zbuluar se autori i krimit së bashku me dy shqiptarë Andrea Sherri, 24 vjeç dhe F. Driza, 16 vjeç, dhe një bullgar përdorën një Porsche Cayenne për të ndjekur dhe qëlluar viktimën me pesë plumba.
Vrasja e profesorit raportohet të ketë motive pasioni, ku autor i dyshuar është partneri aktual i ish-gruas së tij.
Sipas burimeve policore, profesori polak kishte ngritur më parë një padi kundër partnerit aktual të ish-gruas për kërcënime dhe dëmtime fizike, duke raportuar edhe incidente specifike dhune.
Sakaq ky i fundit gjatë rrëfimit të tij në polici, u shfaq i penduar, duke thënë se: “Nuk mund ta duroja më ta shihja të trishtuar dhe të stresuar gruan, dhe thashë se do ta bëja. Kam bërë gjithçka”. Ai është përpjekur të marrë të gjithë përgjegjësinë mbi vete, megjithatë, provat kanë treguar se dhe ish-gruaja e profesorit kishte dijeni për planin e vrasjes.
Sipas mediave vendase, autori i krimit rekrutoi tre bashkëpunëtorë, dy shtetas shqiptarë dhe një shtetas bullgar duke u thënë atyre se do shkojnë diku për të rrahur dikë që po i shqetëson të dashurën. Për transportin e tyre u përdor një Porsche Cayenne me qira, e cila sipas autoriteteve u gjet dhe u identifikua nëpërmjet kompanisë së qirasë, duke çuar në identifikimin e dy shqiptarëve.
Mjeti dyshohet se e ndoqi 43-vjeçarin që nga momenti që ai ishte në Haidari për një takim me ish-gruan dhe fëmijët e tyre, deri në Shën Paraskevi ku u organizua komploti i vrasjes. Menjëherë pas vrasjes, autori dyshohet se braktisi bashkëpunëtorët e tij dhe hipi në një taksi me destinacion Nafplion, duke u përpjekur të fshihej.
Në të njëjtën kohë, ai ia kishte dhënë telefonin celular dhe çelësat e makinës një personi tjetër, me qëllim që të krijonte një alibi të rreme se gjoja ndodhej në Argolidë dhe jo në vendin e krimit. Me rëndësi të veçantë është fakti se arma e vrasjes, sipas deklaratës së tij, është blerë nga Omonia, pa qenë ende e mundur të gjendej.
Sa i përket ish-gruas së profesorit, ajo dyshohet se është përpjekur të fshehë të gjitha gjurmët menjëherë pas vrasjes, ajo e fiku telefonin dhe fshiu të gjitha të dhënat. Megjithatë, policia gjeti një foto të viktimës në telefonin e saj, të bërë nga pas, ditën e vrasjes, duke treguar saktësisht se çfarë kishte veshur, një fakt që, sipas autoriteteve, dokumenton rolin e saj në përgatitjen e krimit. Ende nuk është përcaktuar se kujt i është dërguar imazhi.
