Ashtu siç e parlajmëroi Adriatik Lapaj ditën e djeshme, as Endrit Shabani dhe as daja i tij Zeqir Kordhoni nuk do ta gëzojnë mandatin e vetëm të fituar nga koalicioni “NIsma Shqipëria Bëhet” në Qarkun e Tiranës më 11 Maj.
Kjo për shkak se kandidatja e Adriatik Lapajt, Kleana Xhuveli, e renditur e katërta në listën e mbyllur të këtij koalicioni në Tiranë, i është drejtuar me një shkresë ditën e sotme KQZ-së, ku i kërkon që të revokojë dorëheqjen e dorëzuar para 11 Majit.
Ajo shkruan se ky vendim ka ardhur pas një rishqyrtimi të plotë të rrethanave dhe një konsultimi të gjerë me mbështetësit, familje dhe strukturat e partisë.
Me këtë kërkesë, shanset që Zeqir Kordhoni, daja i Endri Shabanit të bëhet deputet shkojnë drejt zeros, pasi kjo kandidate favorizohet si e renditur më sipër në listë.
Por në lojë janë dhe tre emra të tjerë, Ana Dajko, Livia Stavri dhe Mateo Ziko, të cilët janë sipër Kleana Xhuvelit. E vetmja mundësi që mandatin ta marrë një kandidate e Shabanit është Livia Stavri, e cila është partnerja e tij.
Kujtojmë se ditën e djeshme Lapaj dhe Shabani u përfshinë në replika të ashpra në distancë, duke hedhur akuza të ndërsjellta ndaj njëri-tjetrit.
