Shpenzimet për transportin rrugor arritën në gati 3.9 mld lekë gjatë 4-mujorit të parë 2025, duke shënuar një realizim më të lartë në vlerë nominale, por më të ulët në përqindje në raport me të njëjtën periudhë të vitit të kaluar.
Sipas të dhënave nga Raporti i Monitorimit të Buxhetit, i publikuar nga Ministria e Infrastrukutrës dhe Energjisë, realizimi i shpenzimeve kapitale me financim të brendshëm të programit për 4 – mujorin e parë të vitit 2025, ka një realizim në masën 2.9 mld lekë apo 11% e planit, ndërsa gjatë periudhës janar – prill 2024 realizimi ishte 16% e fondeve të palnifikuara.
Shpenzimet kapitale me financim të brendshëm të programit realizohen nga Ministria e Infrastrukturës dhe Energjisë, me plan të shpenzimeve kapitale prej 5.7 mld lekë për projektet koncensionare të infrastrukturës rrugore, nga Autoriteti Rrugor Shqiptar me plan të shpenzimeve kapitale prej 20.4 mld lekë për zbatimin e projekteve infrastrukturore si dhe nga Instituti Studimeve të Transportit Tiranë, me plan të shpenzimeve kapitale prej 3 milion lekë.
Ndërkaq, edhe realizimi i shpenzimeve kapitale me financim të huaj këtë vit ka një realizim më të ulët në vlerë nominale dhe në % krahasuar me periudhën referuese të vitit 2024. Shpenzimet për 4-mujorin rezultojnë në 364 mln lekë apo 10% e planit.
Këto shpenzime realizohen gjithashtu nga Autoriteti Rrugor Shqiptar për disa projekte, sikurse janë ndërtimi i segmentit rrugor Qukës – Qafë Plloçë, bypassi i Tiranës, përmirësimi dhe rehabilitimi i urave si dhe studim projektime për Urën e Vjosës, Beshirit, etj.
Pjesa tjetër e shpenzimet për transportin rrugor ka shkuar për paga apo shpenzime të tjera korrente, me një vlerë prej 631.4 mln lekë./SCAN
