Kolegji i Posaçëm i Apelimit, KPA u njoh të hënën më 14 korrik me parashtrimet në çështjen e vetingut të ish-gjyqtares së Gjykatës së Lartë, Majlinda Andrea, e cila nuk e ushtron funksionin prej vitit 2016, kur u akuzua për korrupsion dhe u dënua një vit më vonë me 4 vjet burg, por që u konvertua në shërbim prove. Ish-gjyqtarja Andrea nuk ishte e pranishme në seancë. Kolegji konstatoi se ajo nuk kishte depozituar ndonjë shkak të arsyeshëm për mospraninë e saj dhe për rrjedhojë u vendos vijimi seancës gjyqësore, kur në mënyrë të përmbledhur, prokurori Klodian Braho që përfaqëson drejtuesin e SPAK në këtë çështje, paraqiti shkaqet e ankimit dhe kërkimet.
Komisioni i Pavarur i Kualifikimit, KPK konstatoi se institucionet e drejtësisë që ushtrojnë veprimtarinë e tyre për hetimin dhe procedimin disiplinor të magjistratëve, për gjashtë vjet radhazi nuk kishin ushtruar kompetencat e tyre për t’i hequr Andreas statusin e magjistratit dhe vendimarrja për ta shkarkuar u konsiderua si një mënyrë për të zgjidhur përfundimisht statusin e saj të magjistratit.
Por, Komisioneri Publik, Florian Ballhysa e cilësoi të gabuar arsyetimin e Komisionit. Ai vlerësoi se ushtrimi nga ana e Komisionit i kompetencës kushtetuese së kryerjes së procesit të rivlerësimit duke sjellë shkarkimin e magjistratit të dënuar, nuk mund dhe nuk duhet të zëvendësojë ardhjen e pasojës, për shkak të mosveprimit të Inspektorit të Lartë të Drejtësisë, ILD-së dhe Këshillit të Lartë Gjyqësor, KLGJ-së, të cilët Kushtetuta i detyron të veprojnë në rastin konkret.
Edhe prokurori Braho deklaroi të hënën se u qëndronte gjithë shkaqeve të ankimit. Ai konstatoi se KPK ka pasur mundësinë që të verifikonte dhe të hetonte shkaqet që kanë sjellë mosveprimin e ILD-së dhe KLGj-së për të ushtruar kompetencën e tyre kushtetuese të kryerjes së hetimit dhe procedimit disiplinor me qëllim shkarkimin e Andreas. Ai kërkoi që kontrolli i vendimarrjes së KPK nga Kolegji të ushtrohet për të hetuar se cilat kanë qenë shkaqet që kanë sjellë si pasojë mosveprimin e këtyre institucioneve.
Sipas Brahos, procedura e vetingut të Andreas duhet të deklaruar e përfunduar pa një vendim përfundimtar, si në rastin kur institucionet e juridiksionit të zakonshëm disiplinor, ILD dhe KLGJ e kanë përmbushur detyrimin kushtetues duke dhënë ndaj subjektit masën disiplinore të shkarkimit, ashtu dhe nëse këto institucione vijojnë të jenë në kushtet e mosveprimit.
Trupi gjykues i Kolegjit, pasi u tërhoq në dhomë këshillimi vendosi të çelë hetimin gjyqësor dhe t’i kërkojë informacion KLGJ-së për statusin e ish-gjyqtares Majlinda Andrea.
Seanca e radhës u shty për më datë 21 korrik, në orën 09:30. Kolegji kërkoi që palët të jenë të përgatitura edhe për paraqitjen e konkluzioneve përfundimtare./BIRN
