Situata në Haiti po përkeqësohet me ritme alarmante, ku dhuna e bandave ka shkaktuar mbi 3,000 të vrarë vetëm nga janari deri në qershor të këtij viti, sipas një raporti të fundit të Kombeve të Bashkuara.
OKB thekson se një nga episodet më të rënda të dhunës ndodhi në tetor të vitit kaluar në Pont Chaudt, ku mbi 100 persona u masakruan në një ngjarje që përbën “pikë kthese” në përshkallëzimin e konfliktit mes bandave të armatosura dhe grupeve të vetëmbrojtjes.
Që nga ajo kohë, masakrat janë shtuar dhe kanë çuar në zhvendosje masive, veçanërisht në qytetin e Mirebalais, në rajonin Qendror, ku rreth 100,000 banorë janë detyruar të braktisin shtëpitë në fillim të këtij viti për t’i shpëtuar dhunës.
“Shkeljet e të drejtave të njeriut po intensifikohen në zonat jashtë Port-au-Prince, ku prania e shtetit është thuajse inekzistente,” deklaroi Ulrika Richardson, përfaqësuese e përkohshme e Misionit të OKB-së në Haiti (BINUH).
Edhe pse në qershor 2024 u vendos një Mision Shumëkombësh i Mbështetjes së Sigurisë (MMAS), i udhëhequr nga Kenia, për të frenuar dhunën, mungesa e burimeve po pengon efektivitetin e tij.
OKB paralajmëron se kontrolli gjithnjë e më i gjerë i bandave kriminale po rrit rrezikun e përhapjes së dhunës përtej kufijve të Haitit, si dhe rritjes së trafikut të armëve dhe qenieve njerëzore, duke rrezikuar destabilizimin e gjithë rajonit të Karaibeve.
Në përpjekje për të ndalur përkeqësimin e situatës, OKB i bën thirrje komunitetit ndërkombëtar të forcojë mbështetjen për autoritetet haitiane, të cilat mbajnë përgjegjësinë për të mbrojtur popullsinë, si dhe për organizatat që ndihmojnë grupet më të cenueshme.
Pavarësisht se në vitin 2022 u vendos një embargo ndërkombëtare për armët, raporti vëren se zbatimi i saj është i dobët, për shkak të mungesës së kontrollit kufitar nga ana e vendeve eksportuese dhe nga vetë autoritetet haitiane, duke lejuar kështu që dërgesat e armëve të paligjshme të vazhdojnë.
