Kryeministri Edi Rama ka nisur një fushatë me flamurin e lirimit të hapësirave publike nga zaptuesit, duke postuar me zell foto para dhe pas, ku mungojnë vetëm dronët dhe zëri në sfond: “Ja si ishte dhe si u bë”. Së fundmi, Rama ndau pamje nga zona e “21 Dhjetorit” në Tiranë, duke shpallur me krenari se ajo nuk është më “tok e xanun”. Por çfarë është tani?
Mesa duket, tavolinat dhe karriget e kafeneve që pushtonin trotuaret do të zëvendësohen nga projekte të reja “komunitare”. Me fjalë të tjera, hapësira publike do të lirohet nga qytetarët për t’u dhënë qytetarëve por me dizajn të certifikuar ndërkombëtarisht. Vetë Rama njoftoi se mbi 100 arkitektë të mirënjohur ndërkombëtarë që punojnë në Shqipëri do të kontribuojnë falas me idetë e tyre.
Ndërkohë, me syrin e rreptë të drejtësisë urbane, kryeministri ka vizituar edhe bashkitë e Vlorës, Fierit dhe Durrësit, ku kërkoi dorëheqjen e disa drejtorëve për shkak të zaptimit të hapësirave publike. Në Vlorë u kërkua shkarkim për “moskompetencë”, ndërsa në Theth, ku një “fshat turistik” paska lindur pa leje, Rama akuzoi prokuroren Elsa Gjeli për mosveprim dhe kërkoi shkarkimin e saj, sepse sipas tij “Thethi nuk mund të bëhet Manhattan pa plan”.
Ironikisht, qytetarët që shpresuan të shihnin më shumë pemë, stolë dhe hije në hapësirat “të çliruara”, po përgatiten të presin skicimet e projekteve komunitare që, ndoshta, do të jenë shumë moderne për të ecur apo pushuar mbi to.
