Arabia Saudite ka kryer një numër të “tmerrshëm” ekzekutimesh për krime të lidhura me drogën gjatë dekadës së fundit, shumica e të cilëve janë shtetas të huaj, njofton organizata Amnesty International.
Gati 600 persona janë ekzekutuar gjatë 10 viteve të fundit për vepra që lidhen me trafik droge, ku tre të katërtat janë të huaj nga vende si Pakistan, Siria, Jemeni, Nigeria dhe Egjipti.
Pas një moratoriumi të përkohshëm midis viteve 2021 dhe 2022, ekzekutimet për këto krime kanë arritur nivele rekord, me 122 ekzekutime vetëm gjatë vitit 2024 dhe 118 të tjera deri në fund të muajit të kaluar.
Amnesty International paralajmëron për mungesë të vëmendjes ndërkombëtare ndaj proceseve gjyqësore që i quan “jashtëzakonisht të padrejta” dhe me një “mosrespekt të frikshëm për jetën njerëzore”, duke theksuar se numri i të ekzekutuarve pritet të rritet më tej.
Dana Ahmed, hulumtuese për Lindjen e Mesme pranë Amnesty-së, tha: “Po përjetojmë një trend vërtetë tmerrues, me shtetas të huaj që po ekzekutohen në një ritëm shqetësues për krime që as nuk duhej të dënoheshin me vdekje.”
Organizata thekson se shumë nga të dënuarit e huaj janë “mashtuar dhe shfrytëzuar” pasi janë futur në trafik droge gjatë migrimit për punë, me premtime pagesash të ulëta që nuk justifikojnë rrezikun për dënim me vdekje.
Një rast i theksuar është ai i shtatë shtetasve etiopianë dhe një somalez, që janë në rrezik ekzekutimi për trafikimin e 153 kg kanabis, me vlerë të llogaritur në rreth 3.8 milionë dollarë. Sipas dëshmive të tyre në dokumentet gjyqësore, ata u rekrutuan me premtimin e vetëm 267 dollarëve për person.
Shumë nga të huajt në rrezik ekzekutimi kanë sfond arsimor të kufizuar dhe kushte të pafavorshme socio-ekonomike, gjë që i bën më të ndjeshëm ndaj shfrytëzimit dhe të paqëndrueshëm në përfaqësimin ligjor në Arabinë Saudite. Amnesty raportoi mungesë të aksesit në avokatë, mungesë ndihme konsullore dhe mungesë të interpretimit të efektshëm gjatë gjyqeve.
Në të paktën katër raste, të dënuarit kanë raportuar tortura apo trajtime të tjera çnjerëzore gjatë paraburgimit për të nxjerrë konfesionet. Shumë prej tyre nuk e dinin statusin e apelimeve apo kohën e ekzekutimit, duke mësuar vetëm një ditë para se të ekzekutoheshin.
Kristine Beckerle, zv/drejtoreshë e Amnesty International për Lindjen e Mesme dhe Afrikën e Veriut, u shpreh: “Dënimi me vdekje është ndëshkimi më i egër, çnjerëzor dhe degradues. Aleatët ndërkombëtarë të Arabisë Saudite duhet të ushtrojnë presion urgjent për të ndalur këtë valë ekzekutimesh dhe për të zbatuar detyrimet ndërkombëtare për të drejtat e njeriut.”
Autoritetet saudite janë kontaktuar për koment, por nuk është marrë përgjigje. /Associated Press
