Katër persona janë arrestuar në Tiranë për shkelje të ndryshme të Kodit Rrugor, ndërsa disa të tjerë kanë mbetur të plagosur si pasojë e aksidenteve.
Një 35-vjeçar, K. N., u kap duke drejtuar një motomjet pa leje drejtimi, ndërsa një tjetër, A. M., 49 vjeç, u ndalua pasi drejtonte automjetin në gjendje të dehur.
Ndërkohë një aksident u regjistrua në aksin “Elbasan-Tiranë”, ku 31-vjeçari Ç. B. kishte ndaluar automjetin në mënyrë të pasigurt dhe pa sinjalizim paralajmërues. Për pasojë, një motomjet u përplas me mjetin e ndaluar, duke lënë të plagosur drejtuesin e motorit, 26-vjeçarin M. C., i cili ndodhet në spital.
Një tjetër ngjarje ndodhi në kryeqytet, ku një automjet i drejtuar nga 22-vjeçari A. T. përplasi një këmbësore, 87-vjeçaren M. Z. Edhe ajo ndodhet në spital nën kujdesin e mjekëve.
Ndërkohë, përplasja mes dy automjeteve në rrugën dytësore “Tiranë–Vorë” çoi në plagosjen e drejtuesve B. B., 29 vjeç dhe E. A., 21 vjeçe. Ata janë jashtë rrezikut për jetën. Për këtë rast janë referuar materialet në prokurori dhe ka nisur procedimi në gjendje të lirë për të dy.
