Nga data 1 korrik 2025, Komisioni i Prokurimit Publik (KPP) operon pa kryetar, pas largimit të Jonaid Myzyrit nga detyra me urdhër të SPAK. Por e reja më e bujshme vjen nga vendimi i vetë KPP-së për të mos u tërhequr përballë një prej “teka-ve” më të shtrenjta të Bashkisë Tiranë, të firmosura nga kryetarja e komanduar, Anuela Ristani: një tender 465 milionë lekë për mobilimin e zyrave bashkiake.
Vendimi i marrë në mbledhjen e datës 1 korrik është një rast i rrallë kur KPP nuk i bindet verbërisht direktivave të Bashkisë së Tiranës. Ky institucion, prej vitesh i nëpërkëmbur dhe i përdorur si noteri i tenderëve të Erion Veliajt, këtë herë vendosi të mos e lejojë heqjen e pezullimit të një tenderi që është denoncuar për kritere diskriminuese dhe procedura të fryra përtej çdo logjike financiare.
Testimi jashtë vendit dhe faturat marramendëse për një karrige
Një nga kushtet më absurde të këtij tenderi është kërkesa për testim ndërkombëtar të mobilieve, një proces që nuk mund të realizohet në Shqipëri, pasi në vend nuk ka asnjë laborator të certifikuar për testimin e mobilieve. Sipas përllogaritjeve, vetëm kontraktimi dhe realizimi i këtij testi jashtë shtetit kërkon mbi 10 mijë euro, ndërsa kohëzgjatja për përmbushjen e kësaj kërkese është minimalisht 3-4 muaj.
Më datë 26 mars 2025, Bashkia Tiranë njofton se ka zbatuar vendimin. Komisioni i Prokurimit Publik pasi e verifikoi sistemin e prokurimeve elektronike, konstatoi se Bashkia ka hartuar dhe publikuar shtojcën, e cila nuk është në përputhje me vendimin e datës 16 qershor 2025 të KPP.
Pra, për një poltron rrotullues, qytetarët e Tiranës duhet të paguajnë më shumë se sa një rrogë mesatare vjetore, ndërsa operatorët ekonomikë duhet të hyjnë në kosto laboratorike dhe transporti të pajustifikuara, vetëm për të qenë të kualifikuar në këtë garë.
“Shkelje e barazisë së tenderit” Denoncimi i Klama shpk
Në një ankesë të bërë nga kompania Klame shpk, theksohet se kriteret e vendosura nga Bashkia Tiranë janë jo vetëm të ekzagjeruara, por edhe të dyshimta nga pikëpamja ligjore. Nëse një kompani ka pasur mundësi të realizojë testime paraprakisht sipas specifikimeve, atëherë lind dyshimi i fortë se këto specifikime janë shpërndarë paraprakisht në mënyrë të paligjshme – një shkelje flagrante e barazisë në tender, e dënueshme nga Kodi Penal.
Vendimi i KPP: Kriteret janë të ekzagjeruara
Në datën 16 qershor 2025, KPP pranoi pjesërisht ankesën dhe urdhëroi Bashkinë e Tiranës të rishikojë dokumentet e tenderit. Por, si gjithmonë, bashkia zgjodhi manovrën: pretendoi se ka zbatuar vendimin duke publikuar një shtojcë, e cila në fakt nuk përputhet me vendimin e KPP-së. Pra, në vend që të rregullojë shkeljen, Bashkia Tiranë e rikonfirmoi atë.
Në sfond, SPAK dhe hija e një tjetër hetimi
Kjo është vetëm një nga shumë procedura që kanë ngjallur interesin e opinionit publik dhe dyshime të forta të SPAK për mënyrën se si drejtohet Bashkia Tiranë pas arrestimit të Erion Veliajt. Emri i Anuela Ristanit është përmendur disa herë në denoncime publike dhe hetime të nisura, ndërsa vetë tenderi për mobilje luksi është tashmë në radarët e institucioneve ligjzbatuese./Publik.al
