Sot ka nisur zyrtarisht rinumërimi i votave në qarkun Fier.
Në Pallatin e Sportit “Farie Hoti” në Tiranë janë hapur 587 kuti votimi, me qëllim verifikimin e saktësisë së rezultateve fillestare në këtë qark që përfaqësohet me 16 mandate në Parlamentin e Shqipërisë.
Deri në mesditën e së hënës janë rinumëruar 80 kuti ku Partia Demokratike rezulton me 18 vota më tepër, ndërsa Partia Socialiste ka 2 vota të pamerituara. Koalicioni ‘Nisma Shqipëria Bëhet’ ka humbur 6 vota.
Por ajo që vihet re është “lufta” mes kandidatëve brenda partive politike.
Në Partinë Demokratike, deri tani më shumë vota ka humbur kandidati Gentian Çela 20 të tilla, ndërsa i janë shtuar 19 vota Arben Çukos.
Ndërsa në Partinë Socialiste më shumë vota ka humbur Ceno Klosi, 64 të tilla dhe më shumë i janë shtuar Klevis Jahaj 54 vota.
Procesi i rinumërimit në Fier është kërkuar nga koalicioni Nisma Shqipëria Bëhet, i drejtuar nga Adriatik Lapaj, që pretendon një mandat shtesë. Sipas të dhënave, koalicionit i duhen vetëm 517 vota për ta marrë këtë mandat nga Partia Socialiste.
Nëse ky rezultat ndryshon, në Kuvend do të hyjë kandidati Azmer Duleviç, duke zëvendësuar socialistin Ramion Kurti. Gjithashtu, në rrezik për humbje mandati është edhe Zegjine Çaushi, e cila ka vetëm 61 vota më shumë se kandidatja tjetër në listën e hapur të PS-së, Mardita Bardho.
