Një 55-vjeçar nga fshati Kutë në Mallakastër është kapur në flagrancë duke kultivuar cannabis pranë lumit Vjosa.
Në lidhje me ngjarjen, policia ka nisur hetimin edhe ndaj kryeplakut të fshatit për ‘shpërdorim detyre’, pasi dyshohet për lidhje me këtë veprimtari të paligjshme.
Bimët narkotike që u gjetën janë asgjësuar me djegie, ndërsa materialet e këtij rasti janë referuar në Prokurori për ndjekje të mëtejshme penale.
“Në kuadër të planit operacional antidrogë, të koduar “Koordinata”, si rezultat i kontrolleve sistematike dhe atyre të bazuara te informacionet e marra në rrugë operative, shërbimet e Komisariatit të Policisë Mallakastër goditën një tjetër rast të veprimtarisë kriminale të kultivimit të bimëve narkotike. Për këtë rast u vu në pranga shtetasi A. Z., 55 vjeç, banues në fshatin Kutë, pasi u kap në flagrancë buzë lumit Vjosa, zonë ku dyshohet se kishte kultivuar 30 bimë narkotike Cannabis Sativa. Më tej, në lidhje me këtë rast, u referuan materialet në Prokurori, ku nisi procedimi penal për kryetarin e fshatin Kutë, shtetasin G. Z., 35 vjeç, për veprën penale “Shpërdorimi i detyrës”. Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme“, njofton policia.
