Katër persona janë përfshirë në një konflikt fizik pasditen e djeshme në Theth të Malësisë së Madhe, i cili ka degraduar edhe në përdorimin e armëve të zjarrit.
Më konkretisht, Policia e Shkodrës ka arrestuar njërin prej tyre, pasi ka qëlluar me armë ndaj automjetit me të cilin po udhëtonin tre të tjerët, të cilët më pas e kanë dhunuar atë fizikisht. Fatmirësisht nuk ka patur të lënduar, por vetëm dëme materiale.
Në pranga është vënë shtetasi Alfred Rrupa, 33 vjeç, banues në fshatin Theth. Ndërkohë, tre të tjerët që e kanë dhunuar janë prodceduar penalisht në gjendje të lirë, më konkretisht shtetasit N. H., 29 vjeç, P. H., 27 vjeç dhe D. Rr., 29 vjeç, të tre banues në fshatin Theth.
“Nga hetimet dyshohet se dje pasdite, për motive të dobëta, shtetasi Alfred Rrupa ka qëlluar me armë zjarri pistoletë, në drejtim të automjetit me drejtues shtetasin N. H. dhe pasagjerë shtetasit P. H. dhe D. Rr. Nga të shtënat janë shkaktuar vetëm dëme materiale në automjet. Më pas, këta 3 shtetas kanë ushtruar dhunë fizike ndaj 33-vjeçarit.” – thuhet në njoftimin e Policisë.
Uniformat blu kanë sekuestruar armën e zjarrit pistoletë me municion luftarak. Materialet procedurale i kanë kaluar Prokurorisë së Shkodrës për veprime të mëtejshme.
