Zhupa kundër ndryshimeve në Ligjin për Sportin: E ka bërë vetë Fidel Ylli, pa asnjë konsultim publik
Deputetja e Partisë Demokratike, Ina Zhupa, ka sulmuar ashpër projektligjin për disa ndryshime në ligjin “Për Sportin”, gjatë seancës plenare të ditës së sotme, duke e cilësuar si një përpjekje për centralizim dhe kontroll politik të sportit shqiptar.
Sipas Zhupës, projektligji i jep pushtet të tepruar Komitetit Olimpik Kombëtar Shqiptar (KOKSH), duke cenuar kompetencat e federatave të sportit shkollor dhe universitar, në kundërshtim me parimet e Kartës Olimpike. Ajo theksoi se përmes nenit 3, KOKSH merr një rol zyrtar në organizimin e aktiviteteve jashtë orarit mësimor, çka, sipas saj, përbën një ndërhyrje të papranueshme.
“Po i ktheni federatat sportive në satelitë të Komitetit Olimpik. Sportin do ta bëni bashkë, ti zonja ministre dhe Fideli”, deklaroi Zhupa, duke akuzuar edhe mungesën e transparencës në financimet publike.
Deputetja demokrate kritikoi gjithashtu zgjerimin e përkufizimit të “organizatave sportive”, ku përfshihen edhe fondacione të krijuara nga institucione shtetërore dhe të financuara nga buxheti i shtetit. Ajo e krahasoi këtë me modelet e centralizuara të së kaluarës: “Po riktheni ndërmarrjet me ekipet e veta, si në kohën e komunizmit.”
Sa i përket aspektit financiar, Zhupa vuri në dukje nenin 6 të projektligjit, i cili parashikon financim direkt për organizata si KOKSH dhe fondacione të tjera sportive të ngritura nga vetë qeveria, pa kritere të qarta. “Është ndarje fondesh me standarde të dyfishta të nënës dhe të njerkës”, tha ajo.
Në fund të fjalës së saj, Zhupa lëshoi një akuzë të drejtpërdrejtë ndaj kreut të KOKSH, Fidel Ylli, duke thënë se ai e ka hartuar vetë ligjin, pa ndonjë konsultim real me publikun apo ekspertët e sportit.
“Me zë dhe figurë, në Komisionin e Edukimit, Ylli pranoi se e ka bërë vetë ligjin. Pra, një akt i centralizuar, i mbyllur, i bërë brenda një rrethi të ngushtë, pa asnjë transparencë”, përfundoi Zhupa.
