Një sherr me armë zjarri ndodhi pasditen e djeshme në zonën e Institutit në Tiranë, ku u përfshinë shtatë persona, mes tyre dy vëllezër të moshës 22 dhe 25 vjeç.
Sipas policisë, dy të rinjtë goditën me qytën e armës dy bashkëmoshatarë dhe më pas qëlluan në drejtim të tyre, pa i lënduar. Në konflikt dyshohet se janë përfshirë edhe katër persona të tjerë, të cilët kanë dhunuar një 38-vjeçar dhe kanë kërcënuar me armë një 48-vjeçar, kushërinj të të sulmuarve.
Pas ngjarjes, një prej autorëve u arrestua për armëmbajtje pa leje, dy persona të tjerë po hetohen në gjendje të lirë, ndërsa katër janë shpallur në kërkim.
Gjatë kontrollit, policia sekuestroi një armë zjarri pistoletë, municion luftarak dhe tre automjete. Hetimet vijojnë për të sqaruar plotësisht rrethanat dhe për të ndaluar personat e tjerë të përfshirë.
