Presidenti i Shteteve të Bashkuara, Donald Trump, ka vendosur të zgjasë edhe për një vit tjetër gjendjen kombëtare të emergjencës lidhur me situatën në Ballkanin Perëndimor. Vendimi është bërë publik më 24 qershor 2025 dhe do të publikohet në Federal Register, si dhe do t’i transmetohet Kongresit Amerikan.
Gjendja e emergjencës u shpall për herë të parë më 26 qershor 2001, me urdhrin ekzekutiv 13219, për shkak të kërcënimeve ndaj sigurisë kombëtare dhe politikës së jashtme të SHBA-së që lidhen me dhunën ekstremiste dhe pengimin e marrëveshjeve pasluftës në rajon, si Marrëveshja e Dejtonit në Bosnje dhe Rezoluta 1244 për Kosovën.
Që atëherë, kjo gjendje është zgjatur dhe zgjeruar përmes disa urdhërave ekzekutivë të tjerë, duke përfshirë Urdhrin 13304 të vitit 2003, 14033 të vitit 2021 dhe më së fundmi 14140 të janarit 2025, për të adresuar shqetësime të reja si korrupsioni i përhapur, sfidimi i sovranitetit të shteteve të Ballkanit Perëndimor dhe pengimi i institucioneve demokratike.
Në dokumentin zyrtar të publikuar nga Shtëpia e Bardhë, theksohet se veprimet që vazhdojnë të kërcënojnë paqen dhe stabilitetin në Ballkan, përfshirë aktet e dhunës ekstremiste, korrupsionin e gjerë dhe përpjekjet për të minuar marrëveshjet pasluftës, mbeten kërcënim i jashtëzakonshëm për sigurinë kombëtare dhe politikën e jashtme të SHBA-së.
Si rezultat, gjendja e emergjencës do të vazhdojë të mbetet në fuqi edhe pas datës 26 qershor 2025, duke lejuar zbatimin e masave të mëtejshme, përfshirë sanksione ekonomike ndaj personave që pengojnë stabilitetin dhe integrimin demokratik të rajonit.
Ky vendim reflektimi i shqetësimeve të vazhdueshme të Uashingtonit për sfidat politike dhe institucionale në Ballkanin Perëndimor dhe përpjekjet për ruajtjen e paqes dhe sigurisë në rajon.
Zgjatja e gjendjes së emergjencës në Ballkanin Perëndimor nga Shtetet e Bashkuara vjen në një moment kur stabiliteti rajonal mbetet i ndjeshëm, ndërsa tensionet në Lindjen e Mesme vazhdojnë të përkeqësohen.Konfliktet dhe përplasjet në Lindjen e Mesme, përfshirë përshkallëzimin midis Izraelit dhe Iranit, ndikojnë në balancën e sigurisë në të gjithë rajonin euro-atlantik.
