Ish-kryetari i degës lokale të Partisë Demokratike, Genc Deromemaj është emëruar drejtori i ri i Kadastrës së Vlorës. Një emërim i papritur nga drejtoresha e Përgjithshem e Kadastrës, Lorena Goxhobelli.
Ai pritet të zëvendësojë në këtë post Erjona Galanxhi, e cila u largua nga drejtimi i këtij institucioni në fillim të muajit Qershor.
Galanxhi kishte marrë drejtimin e Kadastrës së Vlorës në mars të këtij viti, por raportohet se u largua në fillim të Qershorit dhe është transferuar në postin e nën-drejtorit të Kadastrës në Shkodër.
Gjatë këtyre dy javëve, Kadastra e Vlorës drejtohej në mënyrë të përkohshme nga Paola Sullaj, e cila ka shërbyer më parë si nën-drejtoreshë në të njëjtin institucion.
Burime për mediat konfirmojnë se emërimi i Genc Deromemajt është bërë zyrtar dhe ai tashmë ka marrë detyrën në mënyrë të plotë.
Genc Deromemaj, me profesionin inxhinier, ka qenë kryetar i degës së Partisë Demokratike në Vlorë, ish-kandidat i PD-së për drejtimin e Bashkisë në këtë qytet, si dhe anëtar i Krye3sisë së PD-së.
Që në nisje të përplasjes në kampin blu në vitin 2021, Genc Deromemaj u rreshtua në grupin e Sali Berishës.
Ky është ndryshimi i tretë në drejtimin e Kadastrës së Vlorës brenda dy viteve të fundit, pas largimit të Ina Lucit dhe më pas të Ergys Skënderit, që gjithashtu u tërhoqën nga ky pozicion.
Kriza në Kadastrën e Vlorës vijon prej vitesh, ku problemi i pronave në këtë qark nuk po merr zgjidhje.
