Prokuroria e Posaçme (SPAK) ka marrë zyrtarisht të pandehur kryetarin e Komisionit të Prokurimit Publik, Jonaid Myzyri.
Burime për mediat bëjnë me dije se Myzyri do të paraqitet të hënën (30 Qershor) në SPAK, së bashku me avokatin e tij Ermir Beta për t’u marrë në pyetje si i pandehur.
Mësohet se ai është marrë i pandehur për veprën penale “Shkelje e barazisë në tendera” dhe “Shpërdorim detyre”.
SPAK është duke hetuar procedurat e tenderave përgjatë viteve 2020-2023 pasi ka dyshime të forta se janë zhvilluar pa garë, pasi në shumë raste rezulton pjesëmarrëse vetëm një kompani, e në rast të tjera, shoqëritë janë skualifikuar në mënyrë të padrejtë. Çështja në fjalë po hetohet nga prokurori Elvin Gogaj.
Burime për mediat bëjnë me dije se Jonaid Myzyri po hetohet për një tender për mirëmbajtjen e aksit rrugor “Rrëshen (U.Fanit) – Shpal, Shpal – Q.Bene – K.Hadroj, Shpal-Ura e Repsit” (gjatësia totale 58.7 km), me vlerë rreth 2 miliardë lekë.
Po ashtu, “Boldnews.al” mëson se një ndër hetimet që po zhvillon Prokuroria e Posaçme ndaj Jonaid Myzyrit ka lidhje me shqyrtimin dhe përfshirjen e tij në vendimmarrjen për ankimet mbi prokurime publike të zhvilluara nga institucione të Sigurisë Kombëtare, Drejtoria e Sigurimit të Informacionit të Klasifikuar, etj.
Sipas të dhënave të siguruara nga redaksia, rezulton se Jonaid Myzyri nuk është i pajisur me certifikatë sigurie dhe për këtë arsye, ai do të duhej të përjashtohej nga vendimmarrja për shqyrtimin e ankimeve mbi tenderat specifikë. Megjithatë, siç duket, ai ka shqyrtuar dhe ka votuar mbi ato procedura, në shkelje flagrante të ligjit.
Gjithashtu, mediat kanë raportuar se kreu i KPP-së po hetohet nga SPAK edhe për favorizimin që i ka bërë kompanisë NRG, me pronarë italianin Marco Genicco dhe bashkëshortja e tij shqiptare, Flutura Nuredini. Ata janë nën hetim të thelluar edhe nga Prokuroria e Tiranës për kontrabandë medikamentesh, me të cilat realizojnë spërkatjen kundër mushkonjave.
Jonaid Myzyri është paraqitur disa herë në Prokurorinë e Posaçme, ku është thirrur nga prokurori Elvin Gogaj për të dëshmuar për hetimet ndaj tij.
Jonaid Myzyri digjet për një mandat të dytë në krye të KPP-së
Jonaid Myzyri u emërua në krye të Komisionit të Prokurimit Publik (KPP) në vitin 2020, për një mandat 5-vjeçar, me propozim të Këshillit të Ministrave dhe votim në Parlament. Në janar 2025, Parlamenti shpalli thirrjen për garën e re për kryetar të KPP-së, kur po afrohej fundi i mandatit të Myzyrit.
Në garën e re aplikuan tre kandidatë, mes të cilëve edhe Jonaid Myzyri, që kërkon një mandat të ri. Nga tre kandidatët, vetëm njëri prej tyre, Kreshnik Koka, u skualifikua, pasi nuk mori pjesë në intervistën e strukturuar me gojë.
Në 12 Mars 2025, Këshilli i Ministrave shpalli vlerësimin e kandidatëve të mbetur në garë, ku Jonaid Myzyri mori pikët më të larta, 91 të tilla, krahasuar me kandidatin tjetër në garë, Kreshnik Tërnova, i cili u vlerësua me 82 pikë.
Deri në këtë moment, duket se gjithçka po shkonte në favor të një mandati të ri për Myzyrin. Ligji për “Prokurimet Publike” parashikon që kandidatët duhet, ndër të tjera, të mos jenë nën procedim penal për kryerjen e ndonjë vepre penale (neni 26).
Pra, me marrjen zyrtarisht të pandehur nga Prokuroria e Posaçme, Jonaid Myzyri i “digjet” mundësia për një mandat të dytë në krye të Komisionit të Prokurimit Publik
