Janë zbardhur detaje të reja nga zjarri që përfshiu apartamentin luksoz të ish-banores së “Big Brother VIP Albania”, Françeksa Muratit, në një kompleks pranë liqenit artificial në Tiranë.
Pamjet e publikuara në rrjetet sociale tregonin një situatë dramatike: flakët që shpërthenin në ballkonin e apartamentit dhe tymi i dendur që përhapet nëpër korridoret e godinës.
Mësohet se fatmirësisht zjarri ka shkaktuar vetëm dëme materiale, teksa flakët janë vënë nën kontroll nga forcat zjarrfikëse, të cilat kanë bërë të mundur dhe shuarjen e zjarrit.
Sipas informacioneve për mediat nga shërbimi zjarrfikës shkak për rënien e zjarrit mund të jetë bërë një cigare e ndezur e hedhur nga apartamentet më sipër.
Lidhur me ngjarjen reagoi edhe Policia e Tiranës, ku mësohet se apartamenti i Franceska Muratit është në emër të shtetases K.M.
“Ditën e djeshme, në rrugën “Kristo Luarasi”, dyshohet se për shkak se kanë marrë flakë disa kartonë, është shkaktuar zjarr në ballkonin e banesës së shtetases K. M.. Si pasojë pati vetëm dëme materiale. Grupi hetimor po punon për të dokumentuar shkakun dhe rrethanat e rastit.” – raporton Policia.
Apartamentet në kompleksin në fjalë shkojnë nga 500 mijë euro deri në 1 milion euro, teksa Françeska Murati e reklamoi banesën e saj në rrjetet sociale rreth një muaj më parë.
Postimi i saj ngjalli reagime në rrjet, duke ngritur dyshime se si i siguroi Françeska Murati të ardhurat për të blerë një apartament me atë vlerë në Tiranë. Deri më tani ish-banorja e BBV nuk ka reaguar lidhur me incidentin e djeshëm.
