Irani ka ndërmarrë një sulm me raketa ndaj bazës ajrore amerikane Al Udeid në Katar, në shenjë hakmarrjeje për sulmet që SHBA ndërmori ndaj centraleve bërthamore iraniane të dielën. Megjithatë, sipas raportimeve, Teherani njoftoi paraprakisht autoritetet qeveritare në Katar për të shmangur viktimat.
Burime diplomatike thonë se sulmi kishte një karakter më shumë simbolik sesa shkatërrues, pasi Irani kërkonte të dërgonte një mesazh hakmarrjeje pa e përshkallëzuar më tej konfliktin. Ky veprim i kujdesshëm ka ngjashmëri me ngjarjen e vitit 2020, kur Irani kishte njoftuar Irakun përpara se të sulmonte me raketa një bazë amerikane, në përgjigje të vrasjes së gjeneralit Qasem Soleimani.
Përpara sulmit, diplomatët perëndimorë e kishin konsideruar kërcënimin ndaj bazës Al Udeid si “të menjëhershëm dhe të besueshëm”.
Baza Al Udeid ndodhet pranë kryeqytetit Doha dhe është një nga më të mëdhatë në rajon. Ajo është selia e Komandës Qendrore të SHBA-së për operacionet ajrore në Lindjen e Mesme dhe gjithashtu strehon personel ushtarak britanik.
Sulmi ka ndodhur në një moment tensionesh të larta mes SHBA-së dhe Iranit, por lëvizja e koordinuar për të shmangur viktimat tregon një përpjekje për të mos e thelluar më tej përplasjen.
