Deri më tani, zyrtarisht zgjedhjet e parakohshme lokale do të mbahen në tre bashki, më konkretisht në Mat, Berat dhe Tepelën, për shkak se kryetarët dhanë dorëheqjen për të kandiduar për deputet në zgjedhjet parlamentare të 11 Majit.
Por, në vend që ta thotë Presidenti i Republikës Bajram Begaj se kur do të mbahen këto zgjedhje, pasi do të dekretojë datë, socialistët duket se e dinë më mirë.
Në një prononcim për mediat, sekretari i Përgjithshëm i PS-së, Blendi Klosi deklaroi se këto zgjedhje do të mbahen në vjeshtë dhe se ata kanë nisur nga puna për përzgjedhjen e kandidatëve.
“Tre bashkitë të cilat janë në garë në bazë të tërheqjes së kryetarëve të bashkive, Bashkia e Matit, Beratit dhe Tepelenës, pa dyshim janë në planet organizative të Partisë Socialiste. Shkojmë për t’i fituar të treja bashkitë. Kemi filluar, të paktën në Mat, përzgjedhjen e kandidaturave për rifreskimin e gjithë strukturës sonë elektorale, dhe besoj edhe Berati e Tepelena.
Të tre bashkitë, pa dyshim, do të shkojnë në zgjedhje dhe besoj se periudha e përcaktuar në Kod, pra vjeshta e këtij viti, është periudha e përshtatshme për ta kryer këtë proces.” – tha Klosi.
Gjithsesi, zgjedhjet e parakohshme pritet të mbahen edhe për Bashkinë e Tiranës, ku Erion veliaj ndodhet në burg që prej shkurtit, ku e vetmja shpresë për t’u liruar i ka mbetur vendimi ende i padhënë i Gjykatës së Lartë. Po ashtu, edhe kryebashkiaku i Rrogozhinës, Edison Memolla është dënuar me 1 vit burgim nga GJKKO, ku pritet të jepet vendimi i Apelit që dënimi të marrë formë përfundimtare.
