Deputetja e Partisë Demokratike, Jorida Tabaku, ka reaguar sërish mbi rritjen e çmimeve në Shqipëri, duke theksuar se kriza ekonomike nuk njeh ngjyrë politike.
‘Rritja e çmimeve nuk është çështje e të majtëve apo të djathtëve. Është një çështje që lidhet me mungesën e politikave dhe me ekonominë e kapur nga monopolët’, u shpreh Tabaku.
Sipas saj, Shqipëria ka çmime 30% më të larta për produktet bazë si qumështi, djathi dhe veza në raport me Bashkimin Europian, ndërkohë që pagat janë vetëm 37% e mesatares europiane.
‘Nuk ka ekonomi të lirë, por ekonomi të kapur. Kjo është arsyeja pse çmimet janë më të larta se në vendet e BE-së. Sepse tregjet janë të mbyllura, euro është zhvlerësuar, taksat janë të larta dhe nuk ka kontroll të vërtetë të tregut,’ vijon më tej Tabaku.
Ajo bën thirrje për një ndryshim rrënjësor të modelit ekonomik, për të ndërtuar një ekonomi të drejtë që funksionon për shumicën e qytetarëve, jo për pakicën e lidhur me pushtetin.
Postimi i plotë i deputetes, Jorida Tabaku:
Rritja e çmimeve nuk është çështje e të majtëve apo të djathtëve. Është një realitet që i prek të gjithë-pa dallim bindjesh politike.
Problemi nuk është politika, por mungesa e politikave.
Problemi nuk janë debatet në studio, por mungesa e kontrollit të tregut.
Problemi janë monopolët që kanë kapur çdo sektor të ekonomisë.
Si mund të shpjegohet ndryshe fakti që Shqipëria ka çmime 30% më të larta për ushqimet bazë-qumështin, djathin, vezët-se Bashkimi Europian, ndërkohë që pagat tona janë vetëm 37% e atyre në BE?
Këto çmime nuk janë thjesht pasojë e tregut. Janë pasojë e zhvlerësimit të euros, e taksave të larta dhe e mungesës totale të një politike për tregjet dhe konsumatorët.
Shqipëria nuk ka ekonomi të lirë-ka një ekonomi të kapur.
Ky model duhet ndryshuar. Sot më shumë se kurrë na duhet një politikë që çliron tregjet dhe mbron konsumatorin.
