Tre nga objektet kryesore ku Irani dyshohet se pasuronte uranium për qëllime ushtarake Fordo, Natanz dhe Isfahan janë goditur nga një valë sulmesh ajrore të ndërmarra nga Shtetet e Bashkuara.
Sipas mediave amerikane, për sulmin ndaj Fordos dhe Natanzit janë përdorur të paktën 12 bomba të tipit “bunker buster”, të cilat peshonin rreth 14 tonë secila dhe ishin në gjendje të depërtonin deri në 61 metra nën tokë përpara shpërthimit. Bombat u lëshuan nga avionë bombardues strategjikë B-2 Spirit, të vetmit që mund të mbajnë këtë lloj armatimi.
Fordo, i vendosur në një shpat mali në jug të Teheranit, besohet të jetë ndërtuar aq thellë nën tokë sa është krahasuar me Tunelin e Kanalit që lidh Mbretërinë e Bashkuar dhe Francën. Pikërisht për këtë arsye, ekspertët e sigurisë thonë se vetëm SHBA-të kanë mjetet për ta goditur.
Bombat janë të dizajnuara për të shpërthyer dy herë një herë në sipërfaqe dhe pastaj përsëri në thellësi – për të çarë strukturat mbrojtëse të ndërtesave të nëndheshme.
Ndërkohë, uzina e pasurimit të uraniumit në Natanz, që besohet të ketë tre kate nëntokësore, ishte sulmuar më parë nga Izraeli, duke pësuar dëme të konsiderueshme para sulmit amerikan.
Objekti tjetër i goditur ishte baza bërthamore në Isfahan, ndaj së cilës u përdorën raketa të lëshuara nga toka ose nga deti, që fluturuan në lartësi të ulët për të shmangur sistemet mbrojtëse dhe për të goditur objektivin me saktësi.
Megjithatë, ende nuk dihet shkalla e dëmit të shkaktuar nga këto sulme.
Organizata Iraniane e Energjisë Atomike e cilësoi bombardimin si “një shkelje barbare të ligjit ndërkombëtar”, ndërsa Agjencia Ndërkombëtare e Energjisë Atomike (IAEA) dhe Arabia Saudite kanë raportuar se nuk është vërejtur rritje e niveleve të rrezatimit pas goditjeve.
