Një gjykatë Apeli në Shtetet e Bashkuara të Amerikës, vendosi që presidenti Donald Trump të ruajë kontrollin mbi Gardën Kombëtare të Kalifornisë, ndërsa guvernatori demokrat i shtetit, vazhdon betejën ligjore kundër vendimit të kreut të Shtëpisë së Bardhë për të përdorur trupat në shtypjen e protestave pro emigrantëve në Los Angeles.
Paneli prej tre gjyqtarësh i Gjykatës së Apelit të 9-të në San Francisko pezulloi vendimin e mëparshëm të gjyqtarit, i cili kishte konstatuar se Trump kishte federalizuar në mënyrë të paligjshme Gardën Kombëtare pa koordinim me guvernatorin.
Trupa e Apelit tha se Trump ndoshta ka vepruar brenda kompetencave të tij dhe se edhe nëse nuk kishte koordinuar, Newsom nuk kishte të drejtë të ndalonte urdhrin presidencial.
Megjithatë, vendimi nuk trajton nëse veprimet konkrete të Gardës Kombëtare të federalizuar janë të ligjshme.
Guvernatori Newsom mund të sfidojë ende përdorimin e Gardës dhe të marinsave amerikanë në bazë të ligjeve të tjera, si ndalimi i përdorimit të ushtrisë për zbatimin e ligjit brenda vendit.
Këto çështje mund të shqyrtohen në një seancë gjyqësore të parashikuar për të premten.
Pas vendimit, Guvernatori i Kalifornisë shkroi në X se “Presidenti nuk është mbret dhe nuk qëndron mbi ligjin”, duke theksuar se do të vazhdojë sfidimin ndaj “përdorimit autoritar” të ushtrisë amerikane kundër qytetarëve.
Nga ana tjetër, Trump e përshëndeti vendimin në rrjetin e tij Truth Social, duke thënë se “ky është një vendim i madh për vendin ” dhe se administrata e tij do të vazhdojë të mbrojë amerikanët që respektojnë ligjin.
Më 7 qershor, Trump dërgoi rreth 4000 mijë trupa të gardës dhe 700 marinsa në Los Angeles mes protestave kundër operacioneve ndaj emigranteve të paligjshëm. Ligjshmëria e përdorimit të marinsave ende nuk është shqyrtuar nga gjykata.
