Në rast të përshkallëzimit në një luftë rajonale të konfliktit mes Izraelit dhe Iranit, raketat iraniane mund të arrijnë një distancë deri në 2 mijë kilometra. Megjithatë, duket se mbrojtja ajrore antiraketë e Izraelit mund t’i godasë ato pa dalë nga hapësira ajrore iraniane.
Po bëhet një javë tashmë që në Izrael, ky është një realitet i ri, jetesa mes raketave të hedhura nga Irani si hakmarrje për sulmin izraelit që synon t’u heqë aftësinë iranianëve për të zhvilluar armë bërthamore.
Në media ka paralajmërime se konflikti mes dy vendeve mund të përshkallëzohet nëse Shtetet e Bashkuara përfshihen në krah të Izraelit, dhe pyetja që shtrohet është: deri ku mund të arrijë Irani?
Regjimi i ajatollahëve është i njohur në të gjithë botën për programin e përparuar raketor, që nisi të zhvillohet që prej viteve ’80, gjatë luftës me Irakun. Ky program ka avancuar deri aty sa të prodhojë raketa që godasin objektiva deri në 2 mijë kilometra larg. Siç tregohet në këtë hartë të agjencisë së lajmeve Reuters, raketat mund të arrijnë edhe pranë vendeve të Ballkanit Perëndimor. Raketa që përmbush këtë distancë është Sejjil.
Irani disponon edhe pesë lloje të tjera raketash të fuqishme me të njëjtën ose më të shkurtër rreze veprimi. E teksa shumica prej tyre mbulojnë distancën prej 950 kilometrash me Izraelin, Tel Avivi ka një sërë sistemesh të mbrojtjes ajrore, duke nisur nga Iron Dome, për t’i kapur raketat në ajër.
Mbrojtja më e fuqishme është Arrow 3, e cila mund t’i neutralizojë raketat iraniane që në qiejt e këtij vendi, me një kapacitet goditës deri në 2 mijë kilometra largësi.
