Kryeministri Edi Rama mburret “ditë-natë” se ka një meritë të veçantë për rritjen e numrit të turistëve që vijnë për të vizituar vendin tonë. Pas kësaj, premton në delir se deri në vitin 2030, shqiptarët do kenë në dorë pasaportën e BE!
Premtimet e tij boshe nuk i beson as ai vetë! Mjafton të hedhim sytë rreth e rrothull dhe do shohim pirgje me plehra, uzurpim të hapësirave publike dhe rrugë me gropa që rezultojnë edhe vdekjeprurëse.
Rama thotë se Shqipëria ka hyrë në rrugën e transformimit, por harron që qeveria e tij është e zhytur në korrupsion dhe përfshihet nga skandali në skandal çdo ditë e më shumë.
Shqipëria e qeverisur nga socialistët nuk plotëson as bazën elementare për të pritur pushuesit në vendin tonë. Siç edhe shihet në videot e mbërritura në redaksinë e Boldnews.al, zona e plazhit në Kepin e Rodonit nuk përmbush asnjë standard elitar siç “rezulton” në iluzionet e Ramës.
Pirgje plot me plehra qëndrojnë karshi pushuesve në plazhin e Kepit të Rodonit dhe piqen në diell.
Siç shihet, edhe këtë vit sezoni turistik ka nisur me të njëjtat plagë të vjetra që e ndjekin sektorin prej vitesh: mbetje, mungesë infrastrukture, abuzime të shumta me çmimet, ndërtime kaotike në bregdet dhe uzurpim i hapësirave publike.
Pushuesit vendas dhe turistët e huaj janë të detyruar të paguajnë për çadrën dhe shezllonet, shpeshherë edhe çmime të kripura, por sërish të mos u ofrohen as kushtet minimale në këmbim dhe rrezikojnë të infektohen nga kimikatet dhe ujërat e zeza që derdhen në det apo plehrat e bëra “mullar”.
Pavarësisht se mediat e kanë ngritur këtë shqetësim prej vitesh, qeveria Rama vijon e pashqetësuar të promovojë Shqipërinë me slogane optimiste dhe spote luksoze duke premtuar turizëm elitar.
Duket se premisat janë që bukuria natyrore e Shqipërisë të kthehet në një zhgënjim dhe burim infeksioni për të gjithë pushuesit nga neglizhenca dhe paaftësia e Ministrisë së Turizimit e mbështetur nga Rama.
