Edi Rama ka organizuar pasditen e sotme para selisë rozë festën e 34-vjetorit të PS-së, e cila duhej të ishte festuar që më datën 12 Qershor, por e shtyu për shkak se mori pjesë në dasmën e Alex Soros në New York.
Gjatë fjalës së tij, Rama e vuri fokusin tek fitorja e zgjedhjeve të 11 Majit, ku pretendon se fitorja erdhi si rezultat i mirëorganizimit dhe reflektimit, ku dukej më shumë si një përgjigje ndaj akuzave të opozitës se zgjedhjet i fitoi me krimin e organizuar, duke abuzuar me burimet shtetërore, si dhe me blerje votash.
“Përshëndetje dhe gëzuar ditëlindjen e 34 të PS ju që jeni këtu dhe të gjithë atyre që nuk janë këtu, por janë pjesë e pandashme e kësaj familje të madhe politike. Kjo është një ditëlindje që bëhet e veçantë si rezultat i faktit se vjen pas një fitoreje shumë domethënëse të PS, një fitoreje e cila vjen me një përgjegjësi më të madhe se asnjëherë për vet faktin që u mishërua si rezultat i një mbështetje më të madhe se asnjëherë tjetër.
Padyshim që ne nuk i jemi frikur edhe nuk i jemi shmangur asnjëherë përgjegjësive që vijnë me fitoret dhe kjo besoj se është arsyeja kryesore që pse ne nuk lodhemi së fituari pasi nuk lodhemi së ngarkuari veten me përgjegjësi dhe së reflektuari se çfarë mund të bëjmë më mirë. Natyrisht që shumë gjëra duhen bërë me patjetër më mirë kur kjo fitore është lidhur me një mandat besimi të jashtëzakonshëm për të udhëhequr vendin dhe për të anëtarësuar Shqipërinë në BE brenda kësaj dekade. Nuk ka arsye më të fortë dhe domethënie më të madhe lidhur me përgjegjësinë se sa me këtë objektiv. Objektiv sa i arritshëm aq edhe i vështirë, sa i afërt aq edhe jashtëzakonisht edhe i lidhur me sa shpejt ne do të jemi në gjëndje të përmirësojmë atë çfarë duhet përmirësuar dhe përmbushim çfarë duhet të përmbushim.
Kemi një skuadër të re me jo pak, por 83 deputet dhe më shumë se sa numri është përbërja e skuadrës, ështa harmonizimi i eksperiencës me prurjet e reja dhe është shpërndarja më e mirë se asnjëherë tjetër e peshës së përfaqësismit në çdo territor që i japin kësaj skuadre të re mundësinë që ta përballojë peshën që i duhet në këto vite kur Parlamenti do të duhet të bëhet shtylla kryesore e procesit të anëtarësimit në BE.
Unë besoj që si rezulatat i mirëorganizimit dhe një beteje të bërë me shumë përkushtim në të gjithë territorin kemi po ashtu edhe skuadër mbështetëse jashtëzakonisht premtuese në të gjitha njësitë administrative dhe në zonat ku PS është angazhuar gjatë gjithë këtyre muajve. Patjetër që vlera kryesore e kësaj skuadre janë burimet e veta”, theksoi kryesocialisti.
Rama më tej përmendi Gramoz Ruçin dhe Artan Daden, ku tha se ditën kur ish-kryeparlamentari do të mungojë në oborrin e selisë rozë, nuk do të jetë as ai aty. Gjithashtu, ai shkëmbeu batuta edhe me gazetarin Ylli Rakipi, i cili ishte i pranishëm në festën e 34-vjetorit të PS-së.
“Për të mos u zgjatur, se nuk është as kongres, as asamble, por është ditëlindje. Dua të falënderoj të gjithë ata që janë këtu sot, të ftuar, më zunë sytë dy që janë nga njëri skaj tek tjetri, Frok Çupin dhe Ylli Rakipin. Froku është më afër tribunës, Rakipi është komplet larg, si për të thënë që unë erdha, por unë nuk jam me ju. Ylli e dimë që nuk je me ne, por mos rri aq i distancuar se dukesh si ata që rrinë si në hije. Po të falenderoja për praninë, jemi shumë të qartë që nuk je me ne. Pavarësisht se mund të rrish me Filip Çakullin, prape se prapë nuk bëhesh me ne.
Dua të falënderoj të gjithë ata që janë këtu përpara meje, dhe që janë gjithmonë të pranishëm në këto sebepe, edhe këtu dy ekstreme do marrë, zysh Artën që nuk më ndahet. Zyshe, shyqyr që të kemi. Edhe shokun Gramoz, që sa kohe që do ta shoh këtu, jam i sigurte që partia është në rrugën e duhur. Shqetësohuni në ditën kur do mungoj Gramozi në këtë oborr, por atëherë nuk do jem as unë, kështu që shihni e bëni.” – tha Rama.
