Shkodra vijon që të jetë një nga qarqet më problematike për kultivimin e kanabisit, pasi në këtë rajon ditët e fundit janë zbuluar disa parcela me kanabis.
Policia bën me dije këtë të diel, se ka zbuluar dy parcela me kanabis në qarkun e Shkodrës, konkretisht në njësinë administrative Pult, Shkodër u zbuluan 455 rrënjë kanabis dhe në njësinë administrative Temal, Vau i Dejës u gjetën 11 748 bimë narkotike.
Por ajo që bie në sy, është që policia në të dy rastet nuk ka zbuluar se cilët janë kultivuesit, por ka proceduar penalisht inxhinierët dhe dy vrojtuesit e pyjeve, dhe kryeplakun e fshatit Kolgjen për shpërdorim detyre dhe moskallëzim krimi.
Njoftimi i policisë:
Drejtoria Vendore e Policisë Shkodër dhe Komisariatet në varësi të saj, në kuadër të operacionit të gjerë “Koordinata”, kanë intensifikuar kontrollet në të gjithë territorin e qarkut Shkodër, me qëllim parandalimin dhe goditjen e kultivimit të paligjshëm të bimëve narkotike.
Bazuar në inteligjencën policore dhe monitorimin nga ajri me dronë dhe toka me patrulla këmbësore, janë lokalizuar dhe asgjësuar 12 203 bimë e fidanë të dyshuara narkotike, të llojit cannabis sativa.
Rastet konkrete:
Njësia administrative Pult, Shkodër.
Shërbimet e Komisariatit të Policisë Shkodër gjetën dhe asgjësuan 455 bimë narkotike. Për këtë rast nisi procedimi në gjendje të lirë ndaj inxhinierit të pyjeve, shtetasit A. M., për shpërdorim detyre dhe moskallëzim krimi.
Njësia administrative Temal, Vau i Dejës.
Shërbimet e Komisariatit të Policisë Vau i Dejës asgjësuan 11 748 bimë narkotike. Për këtë rast u proceduan:
Kryeplaku i fshatit Kllogjen, Gj. G., për shpërdorim detyre;
Dy vrojtues pyjesh, shtetasit P. Sh. dhe F. G., për shpërdorim detyre.
Vijon puna për identifikimin, kapjen dhe ndjekjen penale të autorëve të këtyre rasteve.
Policia e Shtetit mbetet e vendosur në luftën kundër kultivimit të drogës, në çdo zonë të vendit.
