Kryedemokrati Sali Berisha këtë të dielë ka reaguar në rrjetet sociale lidhur me zhvillimet e fundit në Lindjen e Mesme, duke e cilësuar regjimin iranian si një diktaturë teokratike që po shkon drejt fundit.
Në postimin e tij, Berisha shkruan: “Goditjet në zemër të regjimit nga forcat ajrore izraelite, të mbështetura nga SHBA, si dhe asgjësimi i elitës terroriste të Gardës dhe ushtrisë së Ajetullahëve, sistemeve mbrojtëse, impianteve bërthamore dhe objekteve të tjera strategjike, po çojnë drejt fundit të merituar regjimin diktatorial, obskurantist dhe destabilizues të Teheranit.”
Sipas Berishës, një fund i shpejtë i këtij regjimi përbën një çlirim për popullin iranian dhe një hap përpara drejt paqes në rajon.
“Partia Demokratike beson se fundi sa më i shpejtë i regjimit të Ajetullahëve, armik i egër i kombit iranian dhe lirive të tij, shënon çlirimin e këtij kombi të madh dhe një fitore të vërtetë për paqen dhe bashkëpunimin në Lindjen e Mesme,” shkruan Berisha.
