Ka dështuar seanca e sotme në Gjykatën e Posaçme për dosjen “Plumbi i Artë”, e cila do të vijojnte me dëshmitë e të penduarit të drejtësisë Erion Alibej. Shkak për shtyrjen e seancës është bërë mungesa e avokatëve të disa prej të pandehurve.
Në vijim të kërkesës së Prokurorisë së Posaçme, gjykata ka vendosur të pezullojë afatet e paraburgimit për të gjithë të pandehurit në këtë çështje, deri në zhvillimin e seancës së radhës, e cila u caktua që të mbahet më 17 Qershor, ora 10:00.
Erion Alibej, i njohur me nofkën “Krymi”, akuzohet si kreu i një organizate kriminale në Elbasan, porositës i disa atentateve me pagesë për hakmarrje dhe motive që lidhen me krimin e organizuar, tek grupi i killerave që drejtonte i penduari i SPAK, Nuredin Dumani.
Fillimisht Alibej ka dëshmuar për autoritetet belge për vrasjen e Arjan Spahiut, i njohur si “Arjani i vogël”, teksa është vëllai i Endrit Alibejt, i cili u ekzekutua në masakrën e Bradasheshit, ku rivalë kishin grupin e vëllezërve Franc dhe Hajdar Çopja, me të cilët kishin qenë bashkë fillimisht në trafikun e drogës në vendet e BE-së.
Klani “Çopja” që drejtohej nga vëllezërit Hajdar e Franc Çopja si dhe Klani “Alibej”, që drejtohej nga vëllezërit Endrit dhe Erjon Alibej, për gati tre vite kontraktuan skuadra ekzekutorësh me pagesë.
Nga njëra anë vepronte Talo Çela, personazh ky me eksperiencë të gjatë në krime dhe ende i pa arrestuar nga strukturat e Policisë së Shtetit. Dhe nga ana tjetër vepronte si kundërshtar, nxënësi i tij Nuredin Dumani, i cili kishte fiksim të vriste Talo Çelën dhe njëkohëshit kryente vrasje me pagesë për llogari të Erjon Alibej dhe Arjan Spahisë.
Vetëm Erjon Alibej, ka kontraktuar dhe paguar për 7 vrasje dhe shkatërrimin e shtëpisë me eksploziv të Talo Çelës shumën prej 388 mijë euro. Pa llogaritur këtu kostot financiarë të blerjes së armëve moderne dhe korrupsionin e zyrtarëve të lartë.
