Ka nisur në Komisionin e Ankimimeve dhe Sanksioneve (KAS) rinumërimi i votave preferenciale të Partisë Demokratike për Qarkut të Dibrës.
Ky proces po mbahet pas vendimit të dy anëtarëve të PD-së në KAS, Ledio Braho dhe Elvis Çefa, të cilët pranoi ankimin e kandidatit të PD-së Xhemal Gjunkshi, i cili pretendon se i janë tjetërsuar votat preferenciale.
Në nisje të mbledhjes, anëtari i KAS, Elvin Lako sqaroi se bëhet fjalë për 42 kuti votimi dhe jo 44, për shkak të një gabimi.
“Nga një verifikim, na rezulton që kemi një dublikim të një QV. QV 1029/00 e keni shkruar dy herë. QV 1096/00 i përket KQZAZ 19. Ne sot do të kqyrim 42 kuti votimi”, – tha anëtari i KAS, Elvin Lako.
Mbetet të shihet nëse në përfundim të këtij procesi do të ketë ndryshim rezultati në renditjen e kandidatëve të PD-së në Qarkun e Dibrës apo jo, gjithsesi, duhet theksuar se asnjë prej tyre nuk do të futet në Kuvend, pasi demokratët në këtë qark morën vetëm dy mandatet e listës së mbyllur.
Sa i përket listës së hapur të PD-së në Dibër, kandidati më i votuar rezultoi Përparim Spahiu me 6245 vota preferenciale, i ndjekur nga Xhemal Gjunkshi, i cili ka bërë ankimin, me 6125 vota preferenciale. Pra, diferenca mes tyre është vetëm 120 vota.
