Komisioni i Ankimimeve dhe Sanksioneve (KAS) ka përfunduar rinumërimin e votave preferenciale të Partisë Demokratike për 42 kuti të Qarkut të Dibrës, sa i përket zgjedhjeve parlamentare të 11 Majit.
Nga rinumërimi janë konstatuar parregullsi, ku duket se pretendimet e kandidatit të PD-së Xhemal Gjunkshi, ankimi i të cilit u mbështet dhe nga dy anëtarët e PD-së në KAS, Ledio Braho dhe Elvis Çefa, kanë qenë të sakta.
Kjo për faktin se nga numërimi i herës së parë nga komisionerët dhe numëruesit politik ka rezultuar se Xhemal Gjunkshit i kishin hequr 17 vota, ndërsa kandidatit Përparim Spahiu, i cili renditet sipër tij, i kishin shënuar 49 vota më tepër.
Pas rinumërimit, Xhemal Gjunkshi ka rikuperuar me mbi 60 vota ndaj Përparim Spahiut, por gjithsesi, renditja nuk ndryshon, pasi diferenca mes tyre ishte 120 vota.
Mësohet se pas rezultatit të rinumërimit të 42 kutive, Xhemal Gjunkshi dhe përfaqësuesit e PD-së do të kërkojnë që të hapen edhe 180 kutitë e tjera të qarkut Dibër, me shpresën se rikuperimi do të shkojë në mbi 120 vota.
Demokratët në Dibër morën vetëm dy mandate, aq sa kishte lista e mbyllur. Në këtë rast, vendi i parë në listën e hapur do të merrte mandatin vetëm në rast vakance nëse një prej kolegëve nga lista e mbyllur dorëhiqet apo humb mandatin.
Sa i përket listës së hapur të PD-së në Dibër, nga zgjedhje e 11 Majit kandidati më i votuar rezultoi Përparim Spahiu me 6245 vota preferenciale, i ndjekur nga Xhemal Gjunkshi me 6125 vota preferenciale. Pra, diferenca mes tyre ishte vetëm 120 vota, ku tashmë pas rinumerimit do të ndryshojë.
