Në emisionin “Me Zemër të Hapur” në News24 është trajtuar historia e një gruaje e cila kërkon ndihmë për të shpetuar nga dhuna motrën e saj.
46-vjeçarja ka rrëfyer se motra e saj është e martuar dhe ka një femije 8 vjeç, por njëkohesisht nga ana tjetër pretendon se ka disa muaj që për shkak të problemeve familjare ka humbur kontaktet me të dhe nuk di asgjë për gjendjen e saj, pasi vet ajo pretendon se motra ndodhet në një prej spitaleve të Tiranës në gjendje të rënde për shkak të dhunës.
Gjatë rrëfimit të saj në studio, ajo tregoi historinë se si motra e saj ishte njohur me bashkëshortin duke thënë se ata ishin njohur nëpërmjet një mblesërie dhe se komshiu i tyre ishte personi që i kishte prezantuar.
Ajo tha se kishte jetuar në shtëpinë e tyre për rreth 1 vit pasi kishte pasur disa probleme dhe motra ishte e vetmja nga familjarët që i kishte hapur derën dhe e kishte strehuar.
“Motra ime është e martuar që prej vitit 2015. Ata kanë pasur probleme që në fillim të lidhjes tyre dhe ishin njohur me shkuesi.Ata kishin edhe një pakt midis tyre që të kishin vetëm dy fëmijë. Një komshi e kishte takuar kur ajo punonte si parukiere dhe i kishte folur për kunatin. Ne në fillim menduam se ai kishte një profesion dhe një jetë normale. Motra ime kishte patur një martesë të dështuar. Unë kisha një komunikim të shpeshtë me motrën time, dhe e kisha kuptuar se diçka nuk shkonte midis tyre. Unë kam dëgjuar se ai nuk ka qënë dakord për ardhjen në jetë të vajzës. Unë kam jetuar edhe me ata tek shtëpia e tyre për rreth 1 vit sepse kisha disa probleme dhe ajo ishte e personi i vetëm që më ka hapur derën”, tha ajo.
Më tej ajo shtoi se motra ishte detyruar që t’i hidhte diçka në ushqimin që ajo konsumonte. Sipas saj, motra dhunohej nga bashkëshorti dhe ajo ishte detyruar të largohej natën nga shtëpia e tyre. 46-vjeçarja theksoi se ajo prej muajsh nuk ka asnjë komunikim me motrën dhe mbesën dhe ka dëgjuar se ajo ndodhet në një prej spitaleve të Tiranës.
Ajo përfundoi fjalën e saj duke thënë se ishte larguar nga shtëpia e motrës dhe e kishin dërguar në një spital psikiatrik dhe se motra ka tentuar ta ndihmojë pasi kunati mund ta kërcënonte edhe me jetën e vajzës.
“Motrën time e detyronin që të hidhte diçka në ushqimin tim. Ajo nuk më tregonte asgjë se çfarë po përjetonte, por unë e kuptova se ajo dhunohej dhe për këtë arsye ajo u largua nga shtëpia natën vonë. Kam disa muaj që nuk kam komunikim me të, edhe kam dëgjuar se ajo ndodhet në një prej spitaleve të Tiranës dhe ajo është marrë me autoambulancë. Familjarët e tjerë kanë informacion për vendodhjen e saj, përveç meje. Unë jam larguar nga shtëpia e motrës dhe më kanë dërguar tek spitali psikiatrik dhe motra nuk ka tentuar të më ndihmojë pasi kunati mund ta kërcënonte edhe me jetën e vajzës”, përfundoi 46-vjeçarja.
