Gjatë dëshmive në GJKKO, i penduari i drejtësisë Erion Alibej ka rrëfyer Mikael Qosja alias Kamani alias Sefo, i cili njihet edhe si “Keli i Kiçit” apo “Kel Kamani” dhe është një nga njerëzit më të afërt të vëllezërve Çopja, ka ofruar Nuredin Dumanit 2 milionë euro për “kokën” e tij.
Alibej tregoi se biseda ishte bërë në “Sky Ecc”, gjatë kohës që Nuredin Dumani qëndronte në shtëpinë e tij, dhe se Mikael Qosja ia kishte dërguar me foto lekët.
Por, sipas të penduarit të drejtësisë, Nuredin Dumani i kishte kërkuar vetëm gjysmën e shumës (1 milion euro) dhe “kokën” e Talo Çelës. Po ashtu, Alibej rrëfeu se autorëve e ngjarjes së njohur si “Masakra e Bradasheshit”, ku mbetën të vrarë vëllai i tij Endrit Alibej si edhe Arben Dylgjeri dhe shtetasi turk Erdal Durunay, ia u kishte treguar Dashnor Dumani, vëllai i Nuredinit.
“Nuredini ka qëndruar disa ditë te shtepia ime dhe kemi fol për ngjarjet. Ka qenë kohë Covid-i, doja të lidhte kontakt Nuredini dhe Dashnor Dumani dhe kam dërgu nje aplikacion Sky ECC që të fliste. Atje rrinte me një shok të Nuredinit në Gjermani dhe i ka shpejgu se ça ka ndodh me vrasjen e Endirit dhe xhaxhait.
Lidhim më pas kontakt me Mikael Qosjen nëpërmjet Elio Bitrit, i cili bëhej informator me të gjitha grupet që paguanin. Dhe Dumani i thotë që jam unë pas vrasjes në Durrës, Mikaeli i dërgon një foto, ku ishte një tavolinë e madhe me shumë euro. Aty ishte shkruar pseudonimin “Krymi”. Ke 2 mln euro i thotë. Në tavolinë kishte me shkrim dore datë, orë dhe vite. Viti 2020. Sipas Nuredinit, i thotë unë dua gjysmat e lekëve dhe dhe Talo Çelën si këmbim. Dhe Mikaeli i thotë, ti vrit Erjonin dhe të jap unë Talon. Mikael Qosja i thotë Nuredinit ‘pushka top t’u beftë’ dhe aty ishte biseda e fundit. Mbaj mend që ka pas një foto të flamurit kanadez, po nuk mbaj mend emrin” – tha ai.
