Dy të rinjtë, Luan Llanaj, 19 vjeç dhe Tomor Mbrati, 17 vjeç, nxënës të shkollës industriale, humbën jetën tragjikisht në një aksident me motor më 1 qershor në Vlorë, në vendin e quajtur “Pusi i Mezinit”, duke tronditur familjet, shokët dhe mbarë komunitetin.
Në vendin ku ndodhi ngjarja e rëndë është realizuar edhe një muarale me fytyrat e të rinjve, ndërsa në një anë të murit janë vendosur lule e janë ndezur qirinj në nder të viktimave.
Për realizimin e saj kanë marrë pjesë edhe shokë të klasës, nxënës të shkollës Industriale “Pavarësia”, ku dy të rinjtë mësonin çdo ditë.
Luan Llanaj dhe Tomor Mbrati humbën jetën tragjikisht pasi po ktheheshin në shtëpi me motor, kur goditën një prej shtyllave të ndriçimit rrugor.
Dy të rinjtë, më pas u përplasën në tokë, ku 19-vjecari Llanaj gjeti vdekjen në vend në mënyrë tragjike. Ndërsa të miturit Mbrati iu dha ndihma e parë, u transportua në spitalin e Vlorës me shenja jete dhe më pas drejt Traumës në Tiranë, por pa mundur dot të shpëtojë.
Në vendin e ngjarjes edhe sot ka shenja të aksidentit tragjik, teksa nuk mungojnë as tufat me lule dhe qirinjtë në përkujtim të dy viktimave.
