Luciano Spalletti nuk do të jetë më trajneri i Kombëtares italiane të futbollit. Presidenti i Federatës, Gravina e ka shkarkuar ish-trajnerin e Napolit nga detyrat e tij pas paraqitjeve të dobëta të Italisë.
Humbja 3-0 kundër Norvegjisë në kualifikueset e Botërorit rezultuan fatale, me palët që u ndanë pas një mbledhje urgjente. Lajmin e ka konfirmuar vetë Spalleti për mediat italiane.
Ai tha se ndeshja kundër Moldavisë ditën e nesërme do të jetë e fundit me të “Kaltrit”.
“Mbrëmë, unë dhe presidenti ishim bashkë, jemi shpesh në kontakt dhe ai më informoi se do të shkarkohem nga detyrat e mia.
Do të kisha preferuar të vazhdoja punën time dhe të qëndroja në pozicionin tim, por e konsideroj këtë si një shërbim për vendin dhe për këtë arsye jam në shërbim të Kombëtares. Nuk duhet të jesh xheloz apo diçka tjetër kur bëhet fjalë për Italinë.
Nesër do të jetë ndeshja e fundit dhe do të përpiqem t’u jap më të mirën djemve. Jam i zhgënjyer me veten time; kur pranova, e dija që kishte gjëra për të rregulluar dhe duhej të sinkronizohesha me lojtarët.
Nuk ia dola plotësisht dhe ju keni qenë shumë të sjellshëm në komentimin e ndeshjes sepse do të kisha merituar komente më të këqija. Jam i zhgënjyer me veten sepse mendova se mund të bëja më mirë.” ka thënë ai.
Ky është një kapitull që mbyllet me zhgënjim për një trajner që kishte nisur me pritshmëri të mëdha, por që nuk arriti të rikthejë shkëlqimin e “Azzurrëve” në arenën ndërkombëtare.
Federata pritet të njoftojë emrin e trajnerit të ri në ditët në vijim.
