Ngjarja e rëndë ka ndodhur në Ravena. Familjarët të shqetësuar i shkuan në vendin e punës, por e gjetën të vdekur. Edhe ndihma e ambulancës ishte e kotë, policia nis hetimet. Pranë u gjet mjeti traktor me të cilin po punohej. Pista e parë është goditja nga mjeti bujqësor, por rrethanat mbeten ende të paqarta.
Ravena- Një ngjarje e rëndë ka ndodhur në Ravena të Italisë, teksa trupi i një 38-vjeçari shqiptar që punonte në fermë, u gjet i pajetë në mes të arës.
Viktima ishte banues prej kohësh në Castel Bolognese, por emri i tij nuk u bë i ditur. Ai po punonte në një arë, pjesë e një ferme bujqësore mes Solarolo dhe Castel Bolognese.
Rreth orës 18:00 të së martës, familjarët të shqetësuar sepse nuk kishin kontaktuar me të, shkuan ta kërkonin në vendin e punës. Por fatkeqësisht, e gjetën të vdekur, raporton media italiane.
Dinamika e aksidentit mbetet e paqartë dhe mbetet për t’u sqaruar pas autopsisë nga ekspertët mjeko-ligjorë.
Sipas dyshimeve paraprake të hetuesve, shqiptari mund të jetë shtypur për vdekje nga një traktor. Ai mendohet se ka marrë goditjen vdekjeprurëse nga piruni i mjetit bujqësor.
Ndihma e shpejtë 118 mbërriti në vendin e ngjarjes, por për fat të keq mjekët nuk mundën të bënin asgjë për ta shpëtuar, vdekja e të riut u konstatua në vend. Në vendngjarje ndodheshin edhe inspektorët e sigurisë në punë dhe karabinierët, të cilët nisën hetimet për zbardhjen e plotë të rastit.
