Një aksident i rëndë me pasojë vdekjen ka tronditur zonën e Martinsicuros, në rajonin e Abruzzos, Itali. Viktimë ka mbetur 47-vjeçari Emidio Croci, baba i tre fëmijëve, i cili po udhëtonte me familjen kur u përplas për vdekje nga një automjet që drejtohej nga një 41-vjeçar shqiptar, me inicialet A.K., banues në San Benedetto del Tronto.
Sipas mediave italiane, shqiptari ishte në timonin e një Mercedes-Benz A-Class, që po lëvizte me shpejtësi të lartë, kur u përplas me një SUV Mercedes GLB, në të cilin ndodhej familja Croci.
Nga goditja fatale, 47-vjeçari humbi jetën në vend, ndërsa bashkëshortja u dërgua në spital në gjendje të rëndë, dhe djali 11-vjeçar u transportua me helikopter në spitalin e Ankonës, ku fatmirësisht ndodhet jashtë rrezikut për jetën.
Pas aksidentit, shqiptari dhe pasagjeri që ndodhej me të u larguan në këmbë nga vendi i ngjarjes, pa dhënë ndihmë. Autoritetet italiane nisën menjëherë kërkimet, ndërsa pak orë më vonë 41-vjeçari u vetëdorëzua në polici.
Ai është dërguar në spital për trajtim mjekësor dhe po hetohet për “vrasje rrugore” dhe “braktisje të vendit të ngjarjes”, pasi dyshohet se ka qenë nën ndikimin e alkoolit.
Ndërkohë, pasagjeri i dytë që ndodhej në automjet vijon të jetë në arrati, ndërsa trupi i viktimës është dërguar në morgun e spitalit të Teramos për ekzaminimet ligjore.
