Qeveria britanike u zotua të mërkurën të furnizojë Ukrainën me 100,000 dronë deri në prill 2026.
Arsyeja e dhjetëfishimit të kësaj ndihme vjen pasi qeveria britanike analizon se mjetet ajrore pa pilot kanë transformuar mënyrën se si zhvillohen luftërat.
Qeveria të hënën miratoi një Rishikim Strategjik të Mbrojtjes së prodhuar në mënyrë të pavarur, i cili bën thirrje për një ushtri më vdekjeprurëse dhe të bazuar në teknologji për t’iu kundërvënë kërcënimeve në zhvillim, përfshirë agresionin e mundshëm rus.
Britania, një nga mbështetëset më të vendosura perëndimore të Ukrainës, synon që të mësojë nga lufta më shumë se trevjeçare e Kievit kundër pushtimit rus, gjatë së cilës dronët kanë transformuar fushën e betejës.
Paketa e dronëve në fjalë ka një vlerë prej 350 milionë paundësh dhe është pjesë e një iniciative më të gjerë mbështetjeje ushtarake prej 4.5 miliardë paundësh për Ukrainën.
Sekretari britanik i Mbrojtjes John Healey do ta bëjë njoftimin në një takim të Grupit të Kontaktit për Mbrojtjen e Ukrainës me 50 vende në Bruksel, të bashkëorganizuar me Gjermaninë.
Përveç dërgesave të dronëve, Britania tha se ka përfunduar dërgesën e 140,000 predhave artilerie në Ukrainë që nga janari dhe do të shpenzojë 247 milionë paund të tjerë këtë vit për të trajnuar trupat ukrainase. /Reuters
