Më shumë se 5.000 shtëpi në Karolinën e Veriut mbetën pa energji elektrike pasi një gjarpër kishte hyrë në një nënstacion elektrik në qarkun Wayne, duke shkaktuar ndërprerje të menjëhershme të furnizimit. Incidenti, i treti brenda vetëm gjashtë ditësh, u raportua nga kompania energjetike Duke Energy, një nga më të mëdhatë në Shtetet e Bashkuara të Amerikës, raporton Newsweek.
Pak ditë më parë, në qytetet Rolesville dhe Durham, rreth 17.000 persona përjetuan një tjetër ndërprerje për shkak të të njëjtit shkaktar: gjarpërinjtë. Këta zvarranikë tërhiqen nga nxehtësia dhe vendet e mbrojtura, dhe shpesh futen në pajisjet elektrike duke shkaktuar ndërprerje automatike të sistemit për shkak të kontaktit fizik me sipërfaqet elektrike.
Zëdhënësi i Duke Energy shpjegoi se në pranverë dhe verë, sidomos pas reshjeve, ka shtim të rasteve ku gjarpërinjtë depërtojnë në infrastrukturat energjetike. “Kur prekin pajisjet pa u shkëputur nga toka apo ndonjë sipërfaqe tjetër, krijojnë qark elektrik të mbyllur dhe aktivizojnë mbrojtjen automatike,” tha ai.
Megjithëse, tingëllon si ngjarje e rrallë, autoritetet thonë se rreth 3% e ndërprerjeve të energjisë në juglindje të SHBA shkaktohen nga kafshë të egra, ku gjarpërinjtë janë një rrezik veçanërisht i zakonshëm për shkak të aftësisë së tyre për të ngjitur transformatorët dhe shtyllat elektrike.
