Mesditën e sotme janë riaktivizuar sërish vatrat e zjarrit në masivin pyjor të Darëzezës, duke u përhapur me shpejtësi në një sipërfaqe të konsiderueshme.
Aktualisht për shuarjen e flakëve janë angazhuar forcat zjarrfikëse të Fierit, Patosit, Roskovecit, punonjës të pyjores dhe banorë të zonës.
Por, terreni i vështirë ranor ka bërë të pamundur ndërhyrjen e mjeteve zjarrfikëse, duke detyruar efektivët të përdorin mjete rrethanore. Mësohet se Bashkia e Fierit ka vënë në dispozicion një traktor me zinxhir për hapjen e korridoreve.
Riaktivizimi i vatrave të zjarrit në Darëzezë ka ndodhur paralelisht me një tjetër vatër zjarri në kodrat e Zhupanit, ku edhe në këtë zonë ndërhyrja e mjeteve zjarrfikëse ka qenë e kufizuar.
Burime për mediat pranë Prefekturës së Fierit kanë bërë me dije se është bërë kërkesë për ndërhyrje nga ajri dhe pritet të niset në mbështetje një helikopter tip “Cougar” i Forcës Ajrore
Sipërfaqja e përfshirë nga flakët është rreth 10 hektarë, ndërsa era po favorizon avancimin e zjarrit në pjesën veriore të pyllit.
