Një ngjarje e rëndë është regjistruar ditën e sotme në Prokurorinë e Sarandës, ku një prokurore është kanosur brenda zyrës së saj nga dy shtetase.
Burime për mediat bëjnë me dije se dy gratë, identiteti i të cilave nuk bëhet ende publik, janë të afërme të një të miture, viktimë e një vepre penale të ndodhur pak ditë më parë në qytet. Mësohet se prokurorja, e cila ka pasur në ngarkim çështjen, kishte kërkuar masën e sigurisë “arrest në shtëpi” për autorin e dyshuar.
Të pakënaqura me vendimin, dy të afërmet janë paraqitur në ambientet e institucionit dhe kanë kërkuar takim me prokuroren e çështjes. Aty, sipas burimeve, ato kanë përdorur gjuhë fyese dhe e kanë kërcënuar magjistraten brenda në zyrë.
Pas incidentit, në vendin e ngjarjes kanë mbërritur efektivë të Policisë së Sarandës, të cilët kanë shoqëruar dy të dyshuarat dhe kanë marrë dëshmitë e tyre. Për shkak të konfliktit të interesit, çështja i është kaluar për hetim Prokurorisë së Gjirokastrës, e cila do të vijojë procedurat për veprën penale “Kanosja e gjyqtarit”.
Prova kryesore në këtë hetim pritet të jenë pamjet filmike nga kamerat e sigurisë së Prokurorisë së Sarandës, të cilat tashmë janë sekuestruar nga autoritetet.
