Pas dështimit të operacionit me Farrukun, te Partizani del një tjetër emër në skenë për sulmin.
Media italiane “La Casa di C” zbulon se Partizani është në negociata me sulmuesin Ismet Sinani. 26-vjeçari në këtë sezon të fundit ishte pjesë e Klodiense në Serinë C italiane, por, pavarësisht paraqitjeve pozitive të sulmuesit, skuadra ra një kategori më poshtë. Ky fakt e shtyn 26-vjeçarin të kërkojë për alternativa të tjera dhe Partizani duket se do të jetë stacioni i radhës.
PRAPASKENAT
Nisur nga njohjet e drejtuesve të kuq në tregun e Italisë, një pjesë e vëmendjes për afrimet është spostuar pikërisht këtu dhe Serie C duket të jetë “shënjestër” e arritshme për shkak të nivelit të ngjashëm që kanë dy kampionatet. Por fakti që skuadrat tona luajnë në kompeticionet europiane dhe reklama më e madhe duket të jetë një shtysë e madhe për Sinanin, që të provojë të luajë në Shqipëri për herë të parë. Në ditët në vijim, klubi i kuq pritet të bëjë lëvizje më konkrete me sulmuesin.
KARRIERA
Sinani është futbollist me origjinë nga Kosova, por i lindur dhe rritur në Itali. Fillimet e tij e tij me futbollin profesionist ai i ka shënuar me të rinjtë e Milanit, një nga akademitë më të mëdha në Itali. Me kuqezinjtë ai luajti deri në grupmoshën U-19, për të nisur më pas aventura në Serinë D dhe Serinë C. Ai ka luajtur me Juve Stabia, Sikula Leonzio, Union Xhorxho, Leviko Terme, Lenjago dhe së fundmi Klodiense, me të cilën i skadon kontrata në qershor. Në 217 ndeshje si profesionist, Sinani ka shënuar 46 gola dhe ka dhuruar 9 asiste. Në sezonin e fundit me Klodiense, ai zbriti në fushë 36 herë dhe regjistroi 5 gola dhe 2 asiste. Periudhën më të mirë në karrierë Sinani ka sezonin 2021-2022 me Leviko Terme në Serie D, ku shënonte 14 gola në 29 ndeshje. Sa u përket përfaqësueseve, ai ka luajtur me Shqipërinë U-17 dhe U-19, si dhe Kosovën U-19.
/Panorama Sport
