Kandidati i PD-së në listën e hapur të Qarkut të Durrësit i është drejtuar me një shkresë Komisionit Qëndror të Zgjedhjeve, ku i kërkon rinumërimin e votave në atë Qark, pasi i rendit faktet për tjetërsimin e votave preferenciale të konstatuara nga pamjet filmike.
“Në datën 26.05.2025, kemi marrë dijeni për Vendimin nr. 1327, datë 24.05.2025 të Komisionerit Shtetëror të Zgjedhjeve “Për miratimin e Tabelës Përmbledhëse për Rezultatin në zonën zgjedhore Qarku Durrës, për subjektet zgjedhore dhe për kandidatët për deputetë, në zgjedhjet për Kuvendin e Shqipërisë të datës 11 maj 2025”. Duke mos qenë dakord me këtë vendim, për shkak se vlerësojmë se gjatë procesit të numerimit të rezultatit zgjedhor prej të cilit ka dalë ky vendim kanë ndodhur shkelje të ligjit, të cilat kanë cenuar rëndë procesin zgjedhor, si dhe tërësia e shkeljeve të ligjit, të ndodhura në këtë zonë zgjedhore ka cenuar procesin zgjedhor në një masë të tillë, që ka ndikuar në ndarjen e mandateve, sic do të provohet gjatë hetimit administrativ, po parashtrojmë këtë ankim me faktet, dispozitat ligjore dhe arsyetimin ligjor”, theksohet në kërkesë.
Ai rendit shifrat e një sërë qendrash votimi dhe shkruan se gjatë kqyrjes së pamjeve filmike ka konstatuar parregullsi që sipas tij përbëjnë trafikim votash dhe keqpasqyrim të të dhënave në procesin e numërimit.
Aulon Kalaja kërkon nga KQZ që t’i vihet në dispozicion koha e nevojshme për analizimin e plotë të pamjeve filmike, me qëllim përgatitjen e plotë të ankesës për shqyrtim. Gjithsesi, ai thekson se nëse KQZ do të vendoste për rinumërim, nuk do të ishte e nevojshme për kqyrjen e të gjitha pamjeve filmike.
“E paraqesim këtë kërkesë sot, me qellim që të zihet afati i ankimit, megjithatë, kërkojmë nga ju, të na vendosni në dispozicion kohën e nevojshme për të analizuar pamjet filmike. Nëse nga ana juaj do të pranohej në mënyrë të menjëhershme hapja dhe rinumerimi i kutive, atëherë, do të ishte e panevojshme që të na ngarkohet barra për të këqyrur çdo pamje filmike. Por duke qene se kjo është pjesë e disponimit tuaj përfundimtar, patjetër që kërkojmë nga ju, të na vendosni në dispozicion një kohe të arsyeshme për tu përgatitur para se të nisi shqyrtimin e ankesën.
Gjykojmë se pretendimet tona janë evidentuar dhe premisa e shkeljeve është vendorur, pasi është vendosur motivi I keqpasqyrimit e të dhenave. Gjithashtu, rezervojmë të drejtën që deri në ditën e shqyrtimit të kërkesës, të shtojmë kërkimet dhe argumentat tona, gjithashtu deri në ate moment të paraqesim pretendime shtesë edhe sa I përket legjitimitetit, kjo nisur nga ngarkesa dhe mospasja e kohes fizike për të përmbyllur cdo argument.” – shkruan Kalaja.
Kujtojmë se Aulon Kalaja u rendit i dyti në listën e hapur të PD-së në Durrës me 8 120 vota preferenciale, ndërsa i pari renditet Arian Ndoja me 9167 vota.
SHKRESA E PLOTË
