Kryetari i Partisë Demokratike, Sali Berisha, është pyetur sot nga gazetarët në lidhje me kandidatët demokratë që kanë kërkuar rinumërimin e votave preferenciale në zgjedhjet e 11 majit.
Në përgjigje, Berisha tha se nuk ka informacion të saktë se sa kandidatë kanë bërë një kërkesë të tillë, por theksoi se çdokush që dëshiron të kërkojë rinumërim është i lirë ta bëjë. Sipas tij, Partia Demokratike nuk do të bllokojë askënd që synon të garantojë transparencën e procesit.
“Ne nuk kemi dy standarde. Ne nuk ndjekim modelin e Edi Ramës që ndalon transparencën”, u shpreh Berisha, duke shtuar se nëse do të rezultojë që ka pasur persona të pandërgjegjshëm gjatë procesit zgjedhor, ata do të identifikohen dhe ndaj tyre do të merren masa ligjore.
“Dhe kjo që thoni ju, 2-3-4-5 verifikime, parregullsi, këto nuk hedhin asgjë poshtë, as në këto që themi, përkundrazi. Kurse për sa u përket kandidatëve, unë nuk e di sa kanë kërkuar rinumërimin apo sa kanë kërkuar procedurën, por cilido që dëshiron, është i lirë ta bëjë. Ne nuk bllokojmë asnjë njeri që ta bëjë transparencën. Në qoftë se ka pasur njerëz të pandërgjegjshëm, ata do identifikohen dhe do mbahet qëndrim ligjor.
Këtu ne nuk kemi dy standarde, por nuk kemi standardin e Edi Ramës që ndalon transparencën. Atë nuk e bëjmë kurrë ne. E qartë përgjigja? Nuk e di sa janë, se ne edhe para dy ditësh, kam përsëritur udhëzimin që çdo kandidat që kërkon transparencë, t’i jepet mbështetje nga partia”, tha Berisha.
