Një alarm për bombë ka tronditur sot qendrën e Tiranës, ku policia ka reaguar me shpejtësi duke rrethuar hotelin “Plaza”.
“Keni bombë në parking, keni 5 minuta kohë të dilni“. Këto ishin fjalët e një telefonuesi i cili ngriti në këmbë Policinë e Tiranës këtë të premte në mbrëmje duke alarmuar për bombë në parkingun e Hotel Plaza.
Personeli është evakuuar menjëherë, ndërsa njësitë antieksplozive po punojnë për të verifikuar dhe neutralizuar çdo kërcënim.
Siç mund ta shihni nga pamjet, edhe klientët e alarmuar kanë dalë jashtë ambienteve të hotelit.
Personi ende i paidentifikuar ka telefonuar recepsionisten e hotelit.
Efektivët e policisë kanë rrethuar zonën dhe forcat xheniere ndodhen në vendin e ngjarjes ku kanë nisur verifikimet dhe hetimet.
Nuk dihen ende shkaqet e alarmit apo autorët e mundshëm, ndërsa hetimet vazhdojnë.
- Pamje nga vendi i ngjarjes:
- Njoftimi i policisë
“Rreth orës 19:35, në Sallën Operative të DVP Tiranë ka telefonuar një punonjëse e stafit të një hoteli në rrugën “Abdi Toptani”, me pretendimin se dikush i panjohur e ka njoftuar për vendosjen e një sasie eksplozivi në parkimin e këtij hoteli.
Menjeherë në vendngjarje ka shkuar forca të shumta policie të cilët kanë bërë rrethimin e zonës dhe evakuimin e personave të hotelit. Gjithashtu janë njoftuar forca xheniere për kontrollin dhe verifikimin e informacionit”, njofton polcia.
