Qeveria ka përcaktuar kushtet me të cilat shoqëria publike ushtarake Kayo do të hyjë në partneritet me ortakët privatë për krijimin e ndërmarrjeve të cilat do të prodhojnë armë dhe pajisje ushtarake.
Një vendim i fundit i Këshillit të Ministrave kushtëzon se në rastin e prodhimit dhe tregtimit të uniformave ushtarake dhe aksesorëve të tyre, Kayo nuk do të pranojë më pak se 40 për qind të aksioneve në ndërmarrjen e përbashkët me privatin.
Vetë shoqëria publike Kayo do të kontribojë në shoqërinë e përbashkët me privatin duke vendosur në dispozicion jo më pak se 20 mijë metër katrorë pasuri të paluajtshme, që do t’i jepen në përdorim shoqërisë së përbashkët.
“Shoqëria shtetërore “KAYO”, sh.a., gjatë procesit të negociimit, në çdo rast, siguron nga subjekti me të cilin negocion, të paktën një vlerë investimi jo më pak se 15 milionë euro në periudhën kohore të 3 vjetëve dhe punësimin e jo më pak se 400 (katërqind) punonjësve në periudhën kohore të 3 (tre) vjetëve,” thuhet në vendimin e Këshillit të Ministrave.
Paralelisht privati do të ketë detyrën të sigurojë ofrimin e linjave teknologjike të prodhimit të uniformave dhe aksesorëve të tjerë, sipas nevojave operacionale të Forcave të Armatosura të Republikës së Shqipërisë dhe strukturave të tjera të sigurisë si dhe sigurimin e rrjetit të shpërndarjes së produkteve në rast eksporti.
Shoqëria e përbashkët që do të krijohet mes Kayos dhe ortakut privat do të ketë detyrimin që të prodhojë uniforma edhe për forcat e armatosura të Shqipërisë si dhe uniformat e strukturave të tjera të sigurisë.
Ndërkohë administratori i shoqërisë do të zgjidhet në dakortësi, ndërsa Kayo do të ketë të paktën 30 % të përbërjes së këshillit drejtues ose këshillit mbikëqyrës të shoqërisë, që do të krijohet.
Qeveria ka autorizuar kompaninë publike Kayo që të negociojë për gjetjen e partnerëve privatë për rigjallërimin e industrisë ushtarake të vendit. Përveç uniformave, qeveria synon të prodhojë në vend përmes partneritetit të Kayos me shoqëri private, edhe armë, municione, por edhe automjete ushtarake në disa nga ish uzinat e vendit./ Kapitali.al
