Në një zhvillim të papritur që ka tronditur ambientin e merkatos italiane, Interi i Milanos ka bërë një ofertë të befasishme për Lazion, duke propozuar një shkëmbim mes Kristjan Asllanit dhe Nicolò Rovella-s.
Por për çudi të të gjithëve, oferta është refuzuar nga presidenti i Lacios, Claudio Lotito.
Sipas mediave italiane Interi ishte i gatshëm të ofronte Asllanin plus një kompensim financiar të rëndësishëm për të siguruar shërbimet e Rovella-s, mesfushor që ka shkëlqyer gjatë dy sezoneve të fundit me Lacion.
Gjithsesi, kjo nuk ka mjaftuar për ta bindur Lotiton, i cili nuk ka ndërmend të lëshojë lehtë një nga asetet më premtuese të klubit.
Rovella, nën vëzhgimin e gjigantëve evropianë
Rovella, në pronësi të Juventusit, pritet t’i bashkohet Lacios përfundimisht këtë verë për një shumë prej 17 milionë eurosh. Kontrata e re që pritet të firmoset në korrik do të përfshijë një klauzolë lirimi prej 50 milionë eurosh, çka e bën edhe më të vështirë çdo tentativë për ta larguar atë.
Interi nuk ka ndërmend të heqë dorë, përveç Asllanit, zikaltrit janë të hapur të përfshijnë edhe Davide Frattesi-n në tratativa dhe po konsiderojnë alternativa si Samuele Ricci dhe Morten Frendrup, por pa rrezikuar largimin e lojtarëve kryesorë nga skuadra.
Ndërkohë, interesimi për Rovella-n nuk vjen vetëm nga Italia: Liverpooli, Aston Villa dhe Manchester City janë gjithashtu në garë për shërbimet e 23-vjeçarit.
Deklarata e Rovella-s emocionon tifozët
Në një intervistë të fundit, Rovella ka treguar se nuk ka ndërmend të largohet nga Lacio:
“Jam i dashuruar. Kam një lidhje të veçantë me këtë klub. Tifozët janë si në Amerikën e Jugut, më të mirët në botë. Dua të qëndroj këtu përgjithmonë. Nuk kam ardhur për të shpërthyer dhe pastaj për të fituar trofe me klube të tjera. Dua të fitoj me Lacion dhe ta kthej në majë. Ky është misioni im.”
Çfarë do të ndodhë tani?
Megjithë refuzimin fillestar, Interi nuk ka hequr dorë. Kjo sagë merkatoje ka gjasa të shndërrohet në një nga telenovelat më të nxehta të verës. Nga njëra anë është insistimi i Interit për ta marrë Rovellan në “San Siro”, nga ana tjetër është dashuria dhe përkushtimi i mesfushorit për ngjyrat bardhekaltër të Romës.
