Në GJKKO, ku mbahet seanca e radhës për dosjen ‘Plumbi i Artë’ vijon dëshmia e bashkëpunëtorit tjetër të drejtësisë, Erion Alibej, i cili akuzohet edhe si kreu i një organizate kriminale në Elbasan, porositëse e atentateve me pagesë për hakmarrje dhe motive që lidhen me krimin e organizuar
Gjatë dëshmisë ai tregon se pas atentatit të 29 dhjetorit 2018, në Bradashesh të Elbasanit, ku humbi jetën i vëllai i tij, xhaxhai dhe një shtetas turk, Alibej është takuar me drejtuesit e policisë të cilët i kërkuan të bashkëpunojë për të zbardhur atentatin.
Alibej u ka thënë se nuk dinte se kush ishin autorët ndërsa zbulon se në atë kohë shefi i komisariatit të Elbasanit kishte qenë ‘i shitur tek Suel Çela. Tjetër provë e lidhjes së krimit me policinë e shtetit.
“Edhe në analizat e mia, vetëm problemi me Xhoni Rusten më dilte. Edhe pse më vinin fjalë për vëllezërit Copja, prapë nuk i besoja. Më ka ardhur dhe familja e Suelit – ushtarë të tyre, ndër ta edhe “Nino”. Bisedova dhe me Suelin; më tha: “Rri i qetë, se do dali e vërteta. Shyqyr që s’ke qenë edhe ti në makinë.” I thashë: “Po kush ka gjujt?”
Ditën që çova familjarët në banesën e fundit, drejtor në Elbasan ishte Altin Qato. Më erdhën policët dhe donin të flisnin me mua, ndërkohë që unë isha në kërkim. Niko Brahimaj ishte tek Krimet e Rënda. Më thanë: “Hajde bëj një deklaratë dhe do të të lirojmë, që të jesh afër familjes.”
Shkova. Ishin aty Qato, Brahimaj dhe shefi i komisariatit, për të cilin e dija që ishte i shitur tek Suel Çela. I thashë: “Nuk e dua këtë këtu.” E nxorën jashtë.
Më thanë: “E dimë që je në kërkim, por na ndihmo me ndonjë informacion – për kë dyshon?”
U thashë: “Do ju duket çudi, por mos kanë ngatërruar objektiv? Nuk di ku t’ju drejtoj.”
Ashtu siç ma dhanë fjalën që do të më lironin për të përcjellë familjarët në banesë, ashtu edhe më liruan. I thashë atij shefit të komisariatit që nxorën jashtë: “Bën mirë të ikësh nga ky qytet.”
