Një eksod i vërtetë drejt Bavarisë pritet në ditët në vijim, teksa Interi përballet me PSG-në në finalen e madhe të Ligës së Kampionëve.
Dhe për tifozët zikaltër, pak rëndësi ka nëse kanë ose jo një biletë në dorë…
Të shohësh skuadrën e zemrës në një finale Champions-i është një ëndërr që nuk realizohet shpesh, përveçse nëse je tifoz i Real Madridit.
Për këtë arsye, të shtunën pritet që rreth 40 mijë tifozë të Interit, nga Milano dhe mbarë Italia, të zbresin në Mynih për këtë takim historik kundër Paris Saint-Germain.
Edhe pa biletë…
Është një takim me historinë, pavarësisht nga rezultati. Dhe askush nuk dëshiron të mungojë. Shumica e këtij “deti zikaltër” në Bavari do të jetë pa biletë për ‘Allianz Arenën’. Nga rreth 40 mijë tifozë që do të jenë në qytet, vetëm 18 mijë kanë një biletë zyrtare të shpërndarë nga Interi për tifozët më besnikë, një numër i barabartë me biletat e dhëna për PSG-në.
Por, në total, UEFA ka shpërndarë 30 mijë bileta të tjera përmes një lotarie publike përpara se të dihej se cilat skuadra do të arrinin në finale. Sipas ‘Gazzetta dello Sport’, një pjesë e mirë e tyre, ndoshta deri në gjysmën, ka përfunduar gjithashtu në duart e tifozëve zikaltër.
Ku do të shihet ndeshja?
Qyteti i Mynihut është gati të mirëpresë edhe ata që nuk do të jenë në stadium. Pika e takimit për tifozët e Interit do të jetë Odeonsplatz, ku nga ora 11:00 deri në 16:00 do të zhvillohet një “Fan Meeting Point” me muzikë ‘live’, performanca artistike, prani legjendash të Interit dhe mundësi për të blerë suvenire.
Për ndeshjen, ata që nuk kanë siguruar hyrjen në stadium kanë disa mundësi për ta ndjekur: Inter Club Monaco ka organizuar një ndjekje të përbashkët në një lokal, por vendet janë shitur për pak orë.
Alternativa mbeten pub-et dhe ekranet gjigante, si ai në Olympiapark, ku UEFA do të organizojë një “Fan Village” të hapur për të dyja tifozeritë.
